Британски „Индепендент“ денеска на својата веб-страна објави текст во кој го критикува премиерот Дејвид Камерон за односон на Велика Британија кон бегалската криза. Откако фотографијата со починатото дете на турскиот брег, била испратена до кабинетот на Камерон, „Индепендент“ добил едноставен одговор „Правиме доволно“ (што се однесува на овој проблем).
Листа на политичари и невладини организации побарале од Камерон да преземе поголеми мерки за мигрантите кои ги напуштаат своите домови од земјите каде што има воени жаришта, по објавувањето на фотографијата од 3-годишниот Ајлан Курди.
Илјадници ја потпишале нивната петиција, во која се бара од британската влада да соработува со земјите од Европската унија за да воспостави прифатлива квота на бегалци.
Камерон сепак, како што пишува „Индепендент“, бил „задоволен“ од напорите на Британија.
– Овие фотографии се шокирачки. Поради ова сме и понатаму во првите борбени редови во меѓународниот одговор на хуманитарната криза во Сирија, и сме вториот најголем донатор на средства. Заедно со финансиската поддршка, обезбедивме засолниште за речиси 5.000 Сиријци откако почна кризата и се бориме против организираното криумчарење, против оние кои сакаат да заработат на сметка на мизеријата на другите, одговорил еден од портпаролите.
Британскиот медиум не добил одговор дали Камерон ги видел фотографиите.
Сепак редакцијата забележува дека иако во одговорот се вели „речиси 5.000 Сиријци добиле помош“, минатонеделните бројки покажувале дека само 216 бегалци биле влезени во владината програма за релокација.
„Индепендент“ соопштува дека одлучиле да ги објават фотографиите од починатото дете како би ја нагласиле очајната ситуација со која се соочуваат бегалците и потребата од помош.
Од почетокот на кризата, повеќе од 4 милиони Сиријци побегнале, а голем дел од нив завршиле во Турција, Либан, Јордан.
Германија неодамна се обврза да прифати од 800.000 до 1 милион.