Фармацевската комора на Македонија го осуди нападот на лекарот на Дигестивна хирургија и бараат поголема заштита на здравствените работници.
„Веќе подолго време сме сведоци на загрозување на безбедноста на животот на здравствените работници во институциите во кои работат. Последниот настан на Клиниката за дигестивна хирургија, кога со оружје беше нападнат и ранет лекар, при што беше доведен во опасност неговиот живот , длабоко не вознемири и не револтира . Најостро го осудуваме овој грозоморен чин и целосно се ставаме во ситуација на нападнатиот лекар и на сите здравствени работници, кои се сведоци на овој немил настан, додека најсовесно си ја вршеле својата одговорна работа, спасувајќи човечки животи.“, се вели во соопштението на Фармацевската комора.
Од комората соопштуваат дека најостро се спротиставуваат не само на последните случувања поврзани со физичко насилство , туку и на сите континуирани напади, врз здравствените работници, како вербални , така и физички.
„Фармацевтите, како едни од најдостапните здравствени работници, секојдневно се изложени на постојан ризик за својата безбедност.Ова се однесува на фармацевтите кои работат во аптеките, болниците и лабораториите и во другите здравствени установи.
Фармацевтската професија е хумана и благородна и е во функција на здравјето и благосостојбата на пациентите. Ставајќи го пациентот во фокусот на вниманието,
Фармацавтската комора, како еснафска организација, посветува врвно внимание на едукацијата на своето членство во обезбедувањето најдобра можна услуга, максимално почитувајќи ги правата на пациентите.“, велат од комората.
Фармацевтите велат се секогаш подготвени на пациентите да им ги дадат потребните совети поврзани со нивното здравје.
„Граѓаните се во постојан и непосреден контакт со фармацевтите.Затоа, апелираме до сите граѓани да се воздржуваат од секаков вид напади врз фармацевтите, а надлежните регулаторни органи да преземат соодветни мерки за заштита на интегритетот на здравствените работници“, велат од Фармацевската комора.