По вчерашната реакција на новинарските здруженија и протестот пред Клубот на пратеници на новинарите и медиумските работници пред почетокот на преговорите на работните групи посветени на медиумите, СДСМ денеска оствари консултативна средба со медиумите.
Имено иако почетокот на преговорите вчера беше закажан за во 12 часот, новинарските здруженија беа известени дека тие се одложени за денес. Протестот, во меѓувреме беше организиран во знак на револт што политичките партии преговараат во име на на медиумите.
Денеска веднаш по првата средба на работните групи и паузата помеѓу рундите кои треба да се одвиваат за време на преговорите, Роберт Поповски, како надворешен член на работната група на СДСМ оствари консултативна средба со новинарите на која информираше дека и СДСМ и медиумската заедница бараат исти регулативи за подобрување на медиумскиот амбиент во кој се работи сега.
Тој информираше дека според медијаторите во овој процес, бидејќи се пробиени роковите, а добиени се ставовите од сите засегнати, многу е важно во моментов да се преговара.
Пробивањето на роковите, вели Поповски, одат само во полза на владејачката партија која не сака промени на сегашниот систем, инаку СДСМ е за вклучување на новинарите на преговарачката маса.
Во однос на реакцијата („Не во наше име“) на новинарските здруженија дека четирите партии нетранспарентно ја кројат судбината на медиумите, Поповски потенцираше дека токму вакви средби ќе одржува постојано, а воедно неговата партија е единствена која го прави тоа.
Поповски надополни дека ставовите на СДСМ соодвестуваат со ставовите на новинарските здруженија.
На денешните преговори, СДСМ преку својот експертски а не политички тим, потенцирал дека потребно е во пакет во Собрание да влезат регулативи според кои би имало долгорочно решавање на проблемите но пред се краткорочно, за што дополнително ќе отворат прашања кои ќе важат до прогласувањето на резултатите од предвремените парламентарни избори во април следната година, за да има фер поле за презентација на секоја од партиите пред изборите.
Партиите денеска ги дале предлозите за работата на Агенцијата за аудио и аудиовизуелни услуги, за работата на Јавниот сервис и за Македонската информативна агенција.
Ставот на СДСМ е дека е неопходна целосна департизација на овие три тела. Тие предлагаат политичките партии да бидат целосно изземени од предлагањето на членови во Советот на Агенцијата за медиуми и во Советот на МРТВ.
Односно, медиумските здруженија, невладините организации и граѓанскиот сектор да предлагаат членови а за јавност и транспарентност, сослушувањето, односно програмата на секој од членовите на Собраниска комисија да се одвива во живо на Собранискиот канал, за потоа да биде избран со 2/3 мнозинство за да се избегне необјективни лица да раководат со овие тела.
Собраниската комисија само би објавувала јавен повик за предлагање членови.
Како што рече Поповски, иако низ медиумите се лицитира со имиња за позициите директор на Агенцијата за медиуми или Јавниот сервис, досега тоа прашање не е отворено на преговорите.
– Ние сметаме дека за слободата на говор или слободата на медиумите воопшто не се преговара но се наоѓаме во вонредна состојба која мора да се решава на овој начин, напомена тој, притоа повикувајќи ги другите партии, секоја од нив да има консултации со новинарите на која ќе ги претстават своите ставови.
А од ЗНМ го повторуваат ставот дека четирите партии ВМРО-ДПМНЕ, СДСМ, ДУИ и ДПА имаат обврска да и објаснат на јавноста, какви решенија договараат за медиумите.
– Сериозно се сомневаме дека нешто не е во ред со нивните предлози. Не сакаат да направат вистински промени во медиумскиот систем. Се водат од принципот ајде да смениме се, за се да остане исто, потенцираа вчера од Здружението на новинари.
Тие остануваат на барањето да бидат вклучени во разговорите.
– Новинарите, медиумите и јавноста – имаме право да знаеме, порачаа тие.
ЗНМ е исто така за деполитизирање на регулаторните тела, бидејќи велат оттаму, неговата работа директно рефлектира врз независноста на медиумите.
Во однос на изборот на членови во Советот на Агенцијата за медиуми, во опширната анализа на здружението за медиумскиот сектор во Македонија, се објаснува за начинот на кој се одбираат членови, за бројот на членовите и за начинот на анулирање на конфликтот на интереси:
Во анализата се појаснува и како треба да изгледа изборот на Програмскиот совет на МРТ, на кој начин, и според кои принципи треба да се избере директорот на Јавниот сервис.
