Граѓанската иницијатива за заштита и унапредување на правата на сексуалните работници во Македонија СТАР-СТАР, денеска по осми пат се приклучи кон глобалната акција за Стоп на насилството врз сексуалните работници, одржувајќи краток марш низ улица Македонија до плоштадот „Филип II“.
Како што велат организаторите, настанот е со цел да се информира македонската јавност за загрижувачката состојба во која сексуалните работници работат.
Според податоците со кои располага СТАР-СТАР и последните истражувања извршени со анкетирање на 320 женски, машки и трансородови лица, сексуалните работници поради незашитата од институциите, најчесто не ги пријавуваат малтретирањата кои ги доживуваат.
Борче Божинов од оваа граѓанска инциијатива, вели поради третманот кој го добиваат од надлежните, како и законите и законските акти кои ја тангираат сексуалната работа во голема мера го овозможуваат прекршувањето на човековите права.
– Непостоењето на закони кои ќе ги заштитат сексуалните работници, уште дотолку ги охрабува Македонците да ги користат услугите и под присила и закана да добијат бесплатна услуга, изјави Божинов.
СТАР-СТАР препорачува извршување на внатрешни контроли, истраги и обвиненија против униформирани лица одговорни за злоупотреба на службената позиција и изнудување на услуга од сексуалните работници.
Тие бараат и вклученост на сексуалните работници во Нацрт-законите, политиките и програмите кои директно влијаат во условите во кои тие живеат и работат.
Истовремено тие апелираат на укинување на прописите, според кои сексуалните работници кои свесно и доброволно се вклучиле во сексуалната работа, парично се казнуваат.
Божинов дополни дека доколку институциите не се втурнат во заштита на оваа ранлива категорија, во иднина тие ќе отворат база на податоци и јавно ќе ги соопштат имињата на сите кои извршиле злоупотреба а се на високораководни функции.
Како најчести сторители на насилство се наведени клиентите (87,6%), полицијата (43,1%) и семејството (28,4%).
Во однос на зачестеноста на малтретирањето, испитаниците, односно сексуалните работници одговориле дека малтретирање од клиенти и полиција им се случува барем еднаш во месецот, дел одговориле дека тоа се случува најмалку еднаш неделно, додека тие што се малтретирани од семејството, одговориле дека секојдневно се соочуваат со малтретирање.