Повеќе од два месеци поранешните работници во „Охис“ излегуваат на мирен протест пред Владата со надеж дека нивните барања ќе бидат сослушани од премиерот Никола Груевски или некои од министрите. Истото го направија и овој вторник.
Исплатата на 24 плати од државниот загубар која тие ја бараат, и понатаму тврдат декат може да се реши со стопирање на некои од проектите на Владата за кои е непотребно да бидат на агендата.
За „Охис“ последниве години распишани се десетици обиди за продажба, но сите без успех.
Диме Стојковски, поранешен работник во компанијата, им порача на властите дека со нив не треба да се игра “пинг-понг“ бидејќи тие се луѓе кои крпат крај со крај во недостаток на средства.
– Им порачувам на нашите парламентарни избраници да не си играат со нас “пинг-понг“ и да не праќаат кај менаџерскиот тим, бидејќи тој тим е поставен од нив, и тој тим го доведе „Охис“ до колапс. Нема идеи за работа туку гледаат само да искористат за себе, вели тој.
Во однос на тоа што бројот на присутни демонстранти се намалува како што одминува времето, Стојковски вели, бројот воопшто не е важен бидејќи тој не сака да дојде до евентуално насилство за ситуацијата да се реши.
Тој дополни дека досега оствариле средба со соработници кои ги информирале дека барањата биле доставени до надлежните министри и премиерот, но сепак велат, бараат директна средба со Никола Груевски, кој сметаат дека ги игнорира.
Тина Петковска пак, потенцира дека нивното присуство пред зградата на Владата е доволно за некој од повиканите министерства да се изјасни, меѓутоа никој не презема ништо.
– Ние ги имаме и писмено доставени барањата и аргументите до премиерот а немаме никаков одговор, да не биде дека ние овде сме се собираме туку така, вели таа.
Поранешните работници во „Охис“ велат тие ќе продолжат со протестите, макар значело и да гинат пред Владата, бидејќи тие немаат друг излез.