По повеќегодишни гласини, рускиот претседател Владимир Путин изјави дека кога на германската канцеларка Ангела Меркел и го претставил неговото куче, лабрадорката Кони за време на средбата во Сочи во 2007-та, не знаел за нејзиниот страв од кучиња, и демантира дека целта му била да ја исплаши.
– Кучето не ви пречи, нели? Таа е многу пријателски настроена и сигурен сум дека добро ќе се однесува, и рекол Путин на Меркел, на што таа му возвратила на руски јазик: „Не, гледам дека таа не јаде ни новинари“.
Но, и покрај нејзината шега, фотографиите од средбата ја прикажуваат непријатноста кај Меркел кога Кони седнала до неа.
Иако, Меркел никогаш јавно не го коментираше настанот, почнаа да се шират гласини дека потегот на Путин бил намерен за да ја уплаши канцеларката во текот на преговорите, што Путин вчера го демантираше.
– Не знаев за нејзиниот страв. Сакав да и го покажам кучето, бидејќи мислев дека ќе и се допадне. Подоцна и се извинив, вели Путин во интервју за Билт. Исто така тој ја опишал Меркел како „искрена“ личност и “голем професионалец“, додавајќи дека нивото на доверба меѓу нив е многу високо.
Односите меѓу Путин и Меркел последниве години станаа едни од најважните и воедно најтензичните меѓу кои било европски лидери.
Тие меѓудругото и буквално говорат ист јазик – Путин зборува германски и работел како агент на КГБ во Дрезден, додека Меркел научила руски јазик додека растела во Источна Германија. Но, сепак, нивните односи се забележително поладни во споредба со оние на Путин со нејзиниот претходник Герхард Шредер.
Меркел стана една од најгласните критичари на Путин меѓу европските лидери и беше една од оние која инсистираше на воведување европски санкции кон Русија по анексијата на Крим во 2014 година.