Премиерот во заминување Никола Груевски по средбата со Хан во Пржино која заврши предмалку одби да даде изјава за медиумите, бидејќи според него рано е за изјави од средбата.
– Рано е за изјави од Пржино, сега одам да отворам нова фабрика, рече Груевски на заминување по средбата.
Тој со Хан се сретна во присуството на неговите сопартијци Никола Попоски – министер за надворешни работи, министерот за финансии Зоран Ставрески, министерот за здравство Никола Тодоров, координаторот на пратеничката група на ВМРО-ДПМНЕ Илија Димовски и шефот на кабинетот на Груевски – Мартин Протуѓер.
Средбата траеше околу еден час, а Хан претходно се сретна и со врвот на опозицијата, односно лидерот на СДСМ – Зоран Заев, потпретседателката Радмила Шекеринска и Оливер Спасовски.
По завршувањето на средбата, Заев кратко пред новинарите рече дека е рано да се даваат какви било прецизни изјави, бидејќи според него императив на Договорот се медиумите и прочистувањето на Избирачкиот список.
Во текот на денот Хан ќе оствари и заедничка средба со претставниците на четирите најголеми политички партии. Тој кусо за новинарите изјави дека се надева оти денот ќе биде добар.
Заедно со доаѓањето на Хан, премиерот денеска ја депонира својата оставка до Собранието со услов „сто дена пред избори“. Вчера продолжија и преговорите на партиските работни групи со посредникот Ванхауте и во делот за медиуми.
Засега останува блокирана Анкетната Комисија за скандалот со прислушувањето како точкa предвиденa во Договорот од Пржино. Се очекува во текот на денот да се дефинира и точниот датум за одржувањето на предвремените парламентарни избори.