Специјалното јавно обвинителство се соочува со проблеми за да одговори на барањата на заштитените сведоци кои се пријавуваат да сведочат во предметите кои ги превзема оваа институција со мандата да ги расчисти сомневањата за сторени кривични дела кои произлегоа од објавата на нелегално прислушуваните разговори.
Во Специјалното обвинителство велат дека деновиве ќе достават предлог за измени на законот за заштитените сведоци со цел да им се обезбеди и гарантира безбедност на оние кои сакаат да соработуваат со оваа институција. Со овие измени Специјалното јавно обвинителство ќе бара да му бидат доделени ингеренциите за определување на статусот на заштитен сведок во предметите кои ги води ова обвинителство.
Според постоечкиот закон одлуката за доделување на статусот заштитен сведок ја донесува Совет за заштита на сведоци. Како што е предвидено со членот 6 од овој закон Советот е составен од пет члена.
Членови на Советот се претставник на Врховниот суд на Република Македонија од редот на судиите, претставник од Јавното обвинителство на Република Македонија од редот на замениците јавни обвинители, директорот на Управата за извршување на санкциите во Министерството за правда, претставник од Министерството за внатрешни работи и раководителот на Одделението во Министерството за внатрешни работи.
Иницијативата на Специјалното јавно обвинителство за измени на законот има за цел да излезе во пресрет на барањата на оние кои сакаат да бидат заштитени сведоци да добијат поголеми гаранции за заштитата на нивниот идентитет. Во голема мерка овие стравувања на потенцијалните заштитени сведоци произлегуваат од блискоста и поврзаноста на поединци во институциите чии претставници се дел од Советот за заштита на сведоци со политичките структури кои согласно мандатот на Специјалното обвинителство се опфатени во истрагата која ја води оваа независна институција.
Во Специјалното јавно обвинителство велат дека при изработката на текстот за измени на заонот се водат од искуствата на повеќе европски држави како на пример Италија каде што анти мафија обвинителството има посебни ингеренции за определување на статусот на заштитен сведок во предметите кои се водат против осомничените за учество или соработка со мафијата.
Инаку според членот 26 од законот мерки за заштита на сведокот се : чување на тајност на идентитетот; обезбедување на лична заштита; промена на живеалиште, односно престојувалиште и промена на идентитет.
Овој закон се применува доколку докажувањето на кривичното дело е проследено со несразмерни тешкотии или не може да се изврши без исказ на лице, кое, поради можната опасност да биде изложено на заплашување, закана со одмазда или опасност по животот, здравјето, слободата, физичкиот интегритет или имот од поголем обем, не се согласува во својство на сведок да даде исказ за следниве кривични дела: – против државата, – против човечноста и меѓународното право, – од областа на организираниот криминал и – за кои со Кривичниот законик е пропишана казна затвор од најмалку четири години.