МРТВ денеска го претстави Етичкиот правилник според кој се залага за време на изборите да известува избалансирано и непристрасно. Правилникот е изработен според примерот на британскиот сервис Би-Би-Си.
Според британскиот амбасадор, Чарлс Гарет, со овој Правилник, МРТВ објавува цврст став дека ќе работи за бенефит на сите граѓани на Македонија.
– Морам да нагласам дека самиот овој документ е недоволен за постигнување на целта, туку тоа зависи од професионалците. Само преку работење според овој Правилник за време на изборите може да се постигне зацртаната цел. Во секое општество, медиумите, особено Јавниот сервис игра клучна улога. Тој има должност да ги покрива изборите непристрасно и точно, порача Гарет, чија амбасада е дел од изготвувањето на стандардите.
Помеѓу другото, Гарет напомена и дека е многу важно Јавниот сервис да ја согледа својата одговорност бидејќи него го плаќаат граѓаните.
– Затоа должност на Јавниот сервис е да му служи на народот, не само на некои туку на сите, со тоа што ќе им понуди квалитетно, балансирано и независно известување за време на изборите, порача амбасадорот.
Извршниот директор на МРТВ, Марјан Цветковски, рече дека МРТВ со ова ја презема обврската да биде урамнотежен и непристрасен во известувањето за изборите и да не дискриминира ниту една политичка партија, коалиција или независен кандидат.
– На сите партии и кандидати ќе им биде обезбеден правичен пристап до медиумите. Ова е основен принцип за спроведување на слободни, фер и транспарентни избори, нагласи Цветковски.
На прашање на Петрит Сарачини од ЦИВИЛ Медиа, дали е воспоставен механизам или тело кое ќе се грижи за спроведување на Принципите и на кое, граѓаните или кој било засегнат, би можеле да му се обратат во однос на почитувањето на овие правила, организаторите на проектот одговорија дека за таков механизам сеуште се разговарало но дека тој сé уште не е воспоставен.
Работата на МРТВ е под лупа и во јавноста важи за пристрасна кон власта со години наназад, а известувањето за време на изборите се критикува во сите извештаи на ОБСЕ-ОДИХР.