Новоформираната Анкетна комисија за аферата со фалсификуваните лични карти на денешната прва седница го изгласа деловникот за работа и покрај бојкотот на опозицијата.
Претседателот на Комисијата Илија Димовски оцени дека има доволно членови за усвојување на Деловникот.
Комисијата се договори прво да се изготви план за работа, а потоа пратеничките групи и независната пратеничка Солза Грчева до понеделник да достават листа на сведоци кои би сведочеле пред оваа Комисија.
По предлог на Димовски во Деловникот влезе и идејата да се направи табела од сите информации кои беа објавувани во медиумите, а се поврзани со аферата за личните карти, меѓутоа ова Комисијата ќе го расправа со резерва, бидејќи не може да ги потврди сите објавени информации.
Секоја пратеничка група и независната пратеничка Грчева до понеделник треба да дадат предлог дали треба да се посети некоја институција која е поврзана со аферата за личните карти и како петта точка до понеделник Комисијата треба писмено да се обрати до која било институција која може да им даде информации за да помогне при извршување на работата. Ваквиот Деловник беше изгласан со еден воздржан.
Илија Димовски рече дека Деловникот во суштина е ист како и Деловникот од Анкетната Комисија за прислушувањето и според него, се остава можност за другите членови да се приклучат во понатамошната работа.
Расправата траеше околу половина час и се одвиваше мирна атмосфера.
Пред почетокот на седницата на оваа Анкетната комисија, пратеникот Петре Шилегов од СДСМ на прес-конференција истакна дека ВМРО – ДПМНЕ измислува нова драмолетка за нова Анкетна комисии и го потврди бојкотот на опозицијата во нејзината работа.
Новата Анкетна комисија е формирана на предлог на ВМРО – ДПМНЕ, од каде аферата со фалсификуваните лични карти што ја откри неделникот Фокус ја поврзуваат со опозициската партија.