Зошто Америка, поточно Кејт Брнс, претставничка на САД и вршителка на должност во Постојаниот совет на ОБСЕ во Виена, го повика ВМРО-ДПМНЕ јавно да ја поддржи работата на Специјалната обвинителка во текот на сите фази на нејзината работа?
Што вели таа- Изјавите на една политичка партија, ВМРО-ДПМНЕ, и нејзините лидери кои ја напаѓаат работата на Специјалната обвинителка се уште еден извор на загриженост.
Веројатно ничии последни денови не поминуваат незабележано.
Конечно, тоа не беше било каква изјава на Груевски, пред десетина дена, тоа беше повеќе од величенствен повик за пресметка со непријателите, кога тој со државнички стил загрми:
“Во април народот ќе ја врати делумно одземената власт, и на клоци ќе ги избрка вештачки насадените функционери, порача Груевски во својот говор”.
Одамна никој не го потценува Груевски- тој знае што говори и на кого се однесуваат клоците, кога предупреди: “Ќе помине долго, многу долго време, пред на некој политичар да му падне на ум да се обидува на власт со голема измама, со соработка со странски разузнавачки служби, со соработка со криминалци, со фалсификатори, Чауши, Ванхојтовци, Катици и со продавачи на магла на типови чија главна цел е да ги изрекетираат бизнисмените во нивниот град”, рече Груевски.
На Америка по се изгледа не и се допаѓа оваа реторика на напад кон Катица Јанева, но која е таа да суди за Груевски, за овој разборит, честит човек, кој деноноќно низ годините куцкал, пишувал и препишувал долги листи на непријатели, како сведоштво на неговиот маченички живот?
Цела година веќе помина како тој се врти и превртува додека спие, се препотува и се раскопчува и повторно закопчува, ги фрла јорганите и пак ги враќа, прави од нив планина и се стуткува под неа, за пак да ја растури огорчено.
Станува избезумено и легнува и повторно срипува и конечно како без здив седнува на трпезариската маса во дневната соба. Борбата почнува, туку како, де разлутен, и намуртен, де со свежина и полет, ги поминува саатите кои како да му клукаат една жила во главата, како да му објавуваат ново раѓање.
Пред него стои топ свежа хартија и обично пенкало, со кое ја запишува историјата на оваа земја: листата на предавници и непријатели кои нема да му побегнат, барем додека е тој жив.
Долга е раката на ВМРО, мрмори тој и треснува на масата, но одеднаш го заплиснува необјаснива радост, за која се уште не е свесен од каде доаѓа, затоа што ниту една мисла не му пролетува, освен зуењето во ушите, кое трае со месеци и заради што и не може да мисли.
Се лупнува во челото, па да, одлично звучи, поетски, Катици и Вајнхотовци, или како и да се вика тој кој му го уништи животот, лагодниот, безгрижен живот во кој немаше сенка, ниту трага од овој пекол.
Тогаш се исправа важно, небаре е реинкарнација на Руми и пред него клечи публика, желна да слушне уште еден негов стих и после може и да умре. Почнува да го вежба говорот кој утредента ќе го слушне цела нација и ќе се расплаче од помислата што ја чека. Унијата на жени е тука да го поддржи, вечната фамилија, функционерите во пад, но што е сега тоа важно, затоа што се работи за говор со кој непријателската сорта ќе угине од клоците на народот. Тоа е таа природна селекција со која немоќните, слабите, неспособните ги снемува. Ако има за тоа и список, уште подобро, во меѓувреме природата може да се погрижи за опстанок на пандите, кукавиците и ретките ластовици.
Но, списокот на Груевски според правилото, се лепи на секоја бандера и дрво, затоа што тој е природата која се справува со непогодите, тој ја чисти земјата од коровот, тој ја има семоќната моќ да пресуди кој влегува во списокот, а кој е потцртан три пати и му се влепени дополнителни три извичници.
Човекот кој беше страв и трепет со години, човекот кој ноќе апсеше и од дома ги влечкаше непријателите пред очите на децата (сетете се на Кежаровски, иако не е само тој), човекот кој беше самата правда и право, човекот кој беше и обвинител и порота и адвокат и судија и полиција, човекот чија слика ја користеа весниците за секој функционер, за сите професии и за секој обичен човек.
Човекот кој сакаше од сите нас да направи Груевски, ете тој човек, кога ќе заврши и овој ден, повторно ќе ја има таа ноќ. Кога пак ќе му се врати на списокот на непријатели, затоа тој список е се што има, се што му останало, откако сите некако заспале. Нема да се сети повеќе на ниту еден човек, на ниту едно име, затоа што сите се тука. И јас и тој и вие. Никогаш нема да му дојде на ум дека има само уште едно име незапишано. Неговиот најголем непријател, оној што сакаше сите од нас да направи Груевски.