Првите луѓе на Здружението на новинари на Македонија и на Самостојниот синдикат на новинари и медиумски работници, Насер Селмани и Тамара Чаусидис, денеска истакнаа дека никако не е прифатливо владиното рекламирање да биде на преговарачката маса на работните групи на политичките партии за реформи во медиумите.
Како што рече Селмани, доколку владиното рекламирање е предмет на преговори кое би се решавало по постигнување на договор за медиумската регулатива тогаш белгискиот посредник Питер Ванхауте никако не смее да стави потпис и да го легитимира тоа.
Селмани вели дека ЗНМ е подготвено да дискутира за форми на субвенционирање на медиумите, но не како што тоа се прави досега, бидејќи како што рече, сегашната корумпираност на медиумите е резултат на таа политика.
Чаусидис рече дека токму тоа што преговорите се запнати кај владиното рекламирање покажува „каде лежи зајакот“.
Коментирајќи ги шпекулациите дека се основа друг новинарски синдикат од новинари кои важат за блиски до власта, Чаусидис вели дека Синдикатот е за синдикален плурализам, сепак шпекулациите дека на новинарите им се давале пристапници со тоа што им било укажувано дека членарината нема да мора да ја плаќаат воопшто, индицира од каде е всушност потребата за нов синдикат.
Таа претпоставува дека уште една причина за ова е и тоа што еден од предлозите за кои се преговора е и улогата на новинарските здруженија.