Пратеничката група на ДУИ вклучително и лидерот Али Ахмети подготвуваат иницијатива поврзана со распуштање на Собранието за која досега се собрани 26 потписи.
Како што брифираат од ДУИ, иницијативата ја поддржуваат и пратениците од ДПА, а потпис ставил и лидерот на ДПА Мендух Тачи.
Иницијативата содржи неколку можни решенија за коишто од ДУИ не даваат детали, но брифираат дека се поврзани со распуштањето на Собранието и се во согласност со препораките на меѓународната заедница соопштени во неделата.
Иако се собраните потписите, иницијативата не е поднесена, бидејќи се чека на договор на останатите политички партии.
Како што брифираат од ДУИ, сите политички партии имаат интензивни разговори и дека до крајот на денот ќе има некаков договор. Тие се надеваат дека „и двајцата македонски лидери ќе мислат на државата“.
Надвор од оваа иницијатива, пратеникот Павле Трајанов пред малку во Собранието изјави дека и тој подготвува две предлог одлуки за Собранието, од кои едната се однесува на самораспуштањето на Собранието и е поврзана со датум на избори 5. јуни, а другата е без дефиниран датум.
Одлуките се заедно со барање за итна седница, но и Трајанов вели дека сепак е во исчекување на усогласување на ставовите на четирите политички партии – потписници на Договор од Пржино.
Трајанов вели дека не постои никаков заговор за некакво ново парламентарно мнозинство.
Според него, поништување на одлуката за самораспуштање на Парламентот е приоритетна, а понатаму би можело да се интервенира во Изборниот законик и да се смени датумот за избори.
За да се повлече одлуката за распуштање на Собранието треба да гласаат најмалку 62 пратеници, а рокот е до вечерва на полноќ.