– Испадот се случи околу 20.30 минути на трафостаницата Козле со 110 на 10 киловолтно напонско ниво, како резултат на „куса врска“ во елементите од трафостаницата. Ја предизвикало животинче од типот на ласица. Тогаш паѓа напонот во трафостаницата, поради што оние кои живеат во населбите Козле, дел од Тафталиџе, дел од Карпош 2, дел од Центар и дел од Водно останаа без напојување, изјави за НОВА Аанас Ковачевски од ЕВН.
Како причина за долготрајноста на прекинот во снабдувањето со струја, Ковачевски објаснува дека е домино ефектот што уследил на уште неколку места, при што биле оштетени кабли како последици на тој дефект, но како што вели до полноќ најголем дел од корисниците добиле струја.
Се уште без струја се жителите во Козле 3, каде прекинот е под земја и екипите на ЕВН утрово започнале со ископување откако претходно добиле согласност од општина Карпош.
Синоќа социјалните мрежи беа преплавени со фотографии од Скопје во мрак. Најмногу коментари имаше за прекинот на струја среде претстава во Драмскиот театар, каде публиката со светлата од мобилните телефони им помогнала на актерите да ја завршат претставата и во мрак.