Иако деталите на спроведувањето на план од Самитот на ЕУ со Турција остануваат нејасни, УНИЦЕФ ги потсетува државите на нивните одговорности и обврски. УНИЦЕФ нагласува дека во спроведувањето на ваквите одлуки надлежните насекаде во Европа, на Балканот и во Турција треба да се раководат според основниот хуманитарен принцип „не повредувај“ во сè што се однесува на грижата за децата бегалци и мигранти.
„Прво и основно треба да се гарантира правото на децата да бараат меѓународна заштита. Децата не треба да се враќаат назад, ако се соочуваат со ризици вклучително затвор, присилно регрутирање, трговија со деца и експлоатација. Да се овозможат безбедни и законски патишта за децата што бегаат од војна и конфликти преку соодветни мерки вклучително обединување на семејствата со што децата, особено оние што се без придружба на возрасен, нема да станат плен на трговци со луѓе“, потенцираат од УНИЦЕФ.
Тековната тешка ситуација на границата меѓу Грција и Македонија е и понатаму неприфатлива за децата кои се мнозинство од оние што чекаат на границата Идомени во северна Грција.
Децата веќе претрпеа многу, бегство од војна и од конфликт и опасно патување. Дополнителен удар е што сега се принудени да спијат на отворено без пристап до основни услуги, без да знаат дали ќе можат да продолжат понатаму или ќе мораат да се вратат назад.
Децата заглавени на премините се под најголем ризик од трговци со луѓе и приоритет мора да се даде на заштитата на нивните права.
УНИЦЕФ е подготвен да и помогне на Владата на Грција за да најде итни решенија за децата бегалци и мигранти, соопштуваат од организацијата.