Платформата за граѓанска политика АЈДЕ!, во вторник во 18 часот, од пред Владата ќе започне протестен марш, кој ќе продолжи покрај канцеларија на претседателот Ѓорѓе Иванов и Собранието, а ќе заврши пред Уставниот суд со голем народен протест.
Вечерта, како што најавија вчера организаторите, пред Уставниот суд ќе се одржи бдеење над Уставот, а ќе кулминира во среда кога ќе ги пречекаат уставните судии кои на седница треба да одлучуваат за иницијативата, да се прогласат за неуставни дел од одредбите на Законот за помилување.
Организаторите на маршот и протестите најавија дека ќе побараат оставка од оние уставни судии кои ја поддржуваат ваквата иницијатива, се со цел, во иднина, како што посочија, да не носат и други одлуки кои ќе му наштетат на Уставот и суверенитетот на државата, и пред се на интересите на граѓаните.
„Се она што се случуваше во изминатиот период беше увертира на она што треба да биде кулминација во среда, односно да се прогласи Законот за помилување за неуставен и тоа поради неговите одредби коишто предвидуваат дека одредени кривични дела не можат да бидат помилувани од страна на претседателот. Ги повикуваме граѓаните да ни се придружат во вторник за да го изразиме својот револт за криминалот и за она што се сака да се случи во Македонија, да се урне целосно правната држава и правдата“ изјави Уранија Пировска извршна директорка на Хелсиншкиот комитет.
Хелсиншкиот комитет ќе биде присутен на седницата во среда, како набљудувач и како „потсетник за срамот од она што го прават судиите, пред се оние кои гласаа за оваа иницијатива“, рече Пировска.
Активистот Петрит Сарачини посочи дека Уставниот суд не смее да се стави над Уставот и дека не смее да дозволи помилување за кривични дела кои претставуваат кршење на основните принципи на демократијата.