Одговорност од претседателот Ѓорѓе Иванов и свикување на итна седница на која ќе се дискутира можноста за импичмент бараат партиите од опозицискиот блок, но и други помали партии и независни пратеници.
Пратеничката група на СДСМ и опозицијата денеска најави дека покренува постапка за утврдување одговорност на Иванов во Собранието и ги повикаа сите партии да ја поддржат нивната иницијатива.
„Со својата вчерашна одлука за општа амнестија на политичарите, Ѓорге Иванов стана заштитник на криминалците, го погази уставот, законите и достоинството на граѓаните што е државен удар. Дополнително му зададе смртоносен удар на договорот од Пржино.Затоа бараме Собранието да биде свикано за покренување на постапка за утврдување на одговорност на Ѓорѓи Иванов“, изјави Горан Сугарески, координатор на Пратеничката група на СДСМ.
Тие ги повикаа и пратениците на ВМРО-ДПМНЕ да дојдат во Собранието и да го потпишат предлогот, доколку не се согласуваат со одлуката на Иванов, како што објавија вчера.
Вонредна седница за гласање на недоверба на претседателот Ѓорѓе Иванов побара и Демократскиот Сојуз. Од партијата ги повикаа сите пратеници да отидат на своите работни места во Собранието заради договор и започнување на постапка за одржување на вонредна седница на Собранието.
„На седницата Собранието треба да донесе одлука за престанување со важност на одлуката за самораспуштање на Собранието, како и да отпочне постапка за импичмент на претседателот Ѓорге Иванов кој одлучи да аболицира политичари под сомнение дека фалсификувале избори, направиле грабеж од неколку стотици милиони евра, прислушкувале илјадници граѓани и ги загрозиле перспективите на државата“, велат од оваа партија.
Лидерот на ДС, Павле Трајанов за НОВА изјави дека согласно Уставот и Деловникот за работа, и покрај тоа што е распуштен, парламентот е во постојано заседание се до денот на конституирањето на нов парламентарен состав.
„Тоа значи дека претседателот си е претседател и парламентот може да заседава, ништо не не спречува да свикаме седница и нема ниту уставна или законска пречка за да биде свикан парламентот“, вели Трајанов. Според него, на иницијативата и се приклучиле и независните пратенички Розе Топузовска, Солза Грчева и Љубица Буралиева.
Трајанов вели дека за да се покрене постапка за одговорност на претседателот се потребни 30 пратеници, додека за да се одржи вонредна седница се потребни 20 пратеници, услови кои сега се исполнети.
Партијата ДОМ исто така објави дека треба да започне институционална борба на свесните пратеници за свикување вонредна собраниска седница за измена на одлуката за распуштање на Собранието, по што би следела постапка за импичмент на претседателот.
Според поранешниот претседател на Собранието, Стојан Андов има простор да се свика вонредна седница во Собранието.
„Ова е вонредна ситуација во земјата и во такви ситуации во некоја историска промена, нешто неочекувано, создадено е сосема нова ситуација сега во земјата која е доволно важен фактор за собранието да одржи седница и тоа треба да биде итна седница“, вели Андов.
За да се започне постапка за утврдување одговорност на претседателот, потребно е двотретинско мнозинство гласови од вкупниот број на пратеници во Собранието. Последниот збор сепак го има Уставниот суд, кој за одговорноста на претседателот исто така одлучува со двотретинско мнозинство.
Од ДУИ и ДПА засега нема информација дали тие ќе ја поддржат иницијативата за утврдување одговорност на претседателот Иванов. ДУИ во повеќе наврати го прогласуваа Ѓорѓе Иванов за нелегитимен претседател, поради тоа што според нив, 90% од Албанците не гласале за претседател.