Државната изборна комисија со 6 гласови „за“ и без присуството на членовите на СДСМ, вклучувајќи го и претседателот Чичаковски, ја изгласа агендата со кои се предвидуваат сите постапки на останатите надлежни институции кои треба да ги почитуваат временските рокови за подготовка на изборите на 5 јуни.
Од денеска до 9 мај сите граѓани на Македонија кои престојуваат во странство повеќе од 3 месеци ќе имаат право да ги пополнат формуларите со цел користење на правото на глас во дијаспората. Избирачкиот список ќе биде достапен за јавноста од 25 април до 9 мај, кога сите граѓани ќе имаат можност да проверат дали ги има на Избирачкиот список. Истото ќе можат да го направат и политичките партии.
Тие во рок од 5 дена ќе имаат право да достават претставки до ДИК, а таа е должна во рок од три дена да им одговори. Политичките партии до 11 мај треба да ги достават листите на кандидати за пратеници. Предизборната кампања ќе трае од 16 мај до 3 јуни.
„На 9 мај завршува процесот на јавната проверка, потоа имаме плус 5 дена кои им се даваат на партиите за разгледување на нивните барања, а потоа следува рокот од 3 дена кои ги има на располагање ДИК, и други 24 часа кои ги има Управниот суд. Може да речам дека до 20 мај ние треба да го завршиме целиот процес со Избирачкиот список, што значи дека до 20 мај процесот за прочистување на избирачкиот список е отворен.“, рече Јакупи.
Претседателот на Државната изборна комисија Александар Чичаковски ја напушти вчерашната седница. Нејасно е дали тој по завршување на сите процедури на Избирачкиот список ќе стави потпис.
Другите членови на ДИК сметаат дека работата на оваа институција е завршена успешно. Коментирајќи ја најавата на Чичаковски околу потпишувањето на Избирачкиот список, велат дека тој како претседател може да оспори едно сомнително гласачко место, а не и целиот Избирачки список, кој ќе биде изгласан од мнозинството членови. Членовите Албанци во ДИК велат дека самиот факт што нивното гласање не се совпаѓа со ставот на политичките партии е доказ дека тие ја завршиле работата професионално.