Државната комисија за спречување на корупција утврдила дека кандидатот за градоначалник од Сојузот за иднината, Андреј Жерновски криел имот, односно давал неточни и непотполни податоци за својот имот.
Според нив, Жерновски давал неточни и непотполни податоци за својот имот кои се разликуваат во повеќе сегменти, во адресите, во наведените квадратури, во основот на стекнување на имотот и во деловите врз кои лицето има право на сопственост, односно на користење на имот.
„Со споредбата меѓу посочените документи и обврските од Законот за спречување на корупцијата ДКСК заклучи дека лицето Андреј Жерновски има давано неточни и непотполни податоци за својот имот кои се разликуваат во повеќе сегменти и тоа: во адресите, во наведените квадратури, во основот на стекнување на имотот и во деловите врз кои лицето има право на сопственост, односно на користење на имот.
Ваквата фактичка состојба овозможува поведување две постапки што произлегуваат од Законот за спречување на корупцијата, прекршочна постапка и барање до УЈП за испитување на имотот и имотната состојба.
Фактите истовремено создаваат основани сомневања дека има елементи од кривичното дело противправно стекнување и прикривање имот од членот 359-а од Кривичниот Законик на РМ.“, се вели во денешното соопштение на ДКСК.
Комисијата направила увид во сите анкетни листови што ги има давано господинот Андреј Жерновски во својство на пратеник и тоа при избор на функцијата пратеник на 21.07.2008 и при престанок на функцијата пратеник 25.07.2011 година.
Исто така ДКСК направила увид и во анкетните листови за избор на функцијата пратеник даден на 04.09.2006 година и за престанок на функцијата пратеник на 09.05.2008 година, како и на анкетните листови дадени во два наврати на почетокот на 2003 година.