Десеттиот ден „Шарена Револуција“ почна како и вообичаено пред седиштето на Специјалното јавно обвинителство, каде околу 1 час граѓаните им дадоа поддршка на обвинителите во оваа институција за нивната работа.
Мирниот протест кој започна пред СЈО, заврши пред Владата на Република Македонија, каде припадниците на Единицата за брзо распоредување и полицајците со спуштени штитови ги пречекаа граѓаните.
Во меѓувреме нов објект кој се здоби со симболот на „Шарената Револуција“ – разните бои, е седиштето на Агенцијата за медиуми, која воедно е и седиште на Агенцијата за млади и спорт.
За разлика од претходните протести, патот од СЈО кон зградата на ЕУ делегацијата беше прооден и немаше полициски блокади, а демонстрантите беа пречекани со звучници од кои ечеа стиховите „Во борба во борба“.
Пред да „се обои“ зградата на агенциите, револтираните граѓани порачаа дека „Ова беше парк“, алудирајќи на насилното рушење на паркот и дрвосечата која се случуваше во тензична атмосфера во доцните часови и кога уапсени беа членови на „Паркобраните“ кои деноноќно чуваа стража пред да дојдат багерите.
Демонстрантите вечерва упатија и неколку пораки преку организаторите на #Протестирам: Доаѓањето на овие протести се строго граѓански, без застапување на било која партија, дека потребно е како што велат, криминалците од власта да завршат во затвор но и дека оваа борба е борба и за оние кои се присилени и уценети да присуствуваат на контра-протестите.
Илјадниците граѓани денешниот протест кој започна како и вообичаено во 18 часот, го завршија пред Владата на Република Македонија, без тензии и мирно.
Последната парола која беше исцртана на улицата „Илинденска“ пред Владата гласи „Ние сме шарената ѕвезда на ЕУ“.
Подетално за тоа како хронолошки се одвиваа протестите можете да погледнете во видеото.
