Под силно полициско обезбедување и со поштенски возила, денеска во предвидениот рок, Државната изборна комисија го подигна гласачкиот материјал за вториот изборен круг и за гласачките места каде што ќе се прегласува на локалните избори.
Во битолската печатница „Киро Дандаро“, иако имаа куси рокови поради големиот број на приговори во ДИК и Управниот суд, сепак, навреме беше напечатен избирачкиот материјал.
„Иако рокот беше многу краток за само два дена, направивме околу еден милион и триста илјади гласачки ливчиња и избирачките списоци, што мислам дека е рекорд во нашата работа. Се е подготвено за подигнување на материјалите“ рече Драги Милошевски, директор на печатницата „Киро Дандаро“ од Битола.
Претходно, по одлуката на Управниот суд, Државната изборна комисија одлучи дека повторување на гласањето во првиот круг ќе има на три избирачки места во Општина Струмица како и на едно избирачко место во Општина Долнени.
Во втор круг ќе се оди во 29 општини плус градот Скопје.
Од ДИК во вториот изборен круг очекуваат фер и демократски избори.