Петтемина обвинети во случајот „Ќелија“ кои ја признаа вината денеска добија затворски казни од две до четириипол години.
Ова беше прв случај во Македонија кој беше поведен против лица кои заминуваат во странски војски и кои се борат на воените жаришта на Блискиот Исток откако во септември 2014. се воведени законски услови за кривично гонење за ова дело.
Иса Фуга е осуден на 4 и пол години казна затвор,Абдула Абдулахи за учество во странска војска е осуден на 3 години и 1 месец, Ерол Рустеми за учество во странска војска, полиција, паравоена или параполициска формација на 4 години затвор, додека Мухамед Имери и Стефан Стефановски за учество во странска војска, полиција, паравоена или параполициска формација се осудени на двегодишна казна затвор.
Обвинетите не беа донесени во судницата.
Судијата Ѓоко Ристов рече дека одлуката ја донел врз основа на Законот за одмерување на казните, имајќи ги предвид олеснителните околности за обвинетите дека дел од нив се во брачна заедница, дека имаат деца, дека не се осудувани и дека ова е прво кривично дело кое го сториле.Според него, висината на казната треба да има специјална, но и генерална превенција за повторување на делото.
Петмината во понеделникот го признаа делото и изјавија дека одлуката ја донеле по сопствена волја и без притисок.
Претходно, по спогодбата за вина, на другите шестмина обвинетите им беа определени казни од 5 до 7 години казна затвор. Оџата Реџеп Мемиши, за делото учество во странска војска, полиција, паравоени или параполициски формации е осуден на казна затвор во траење од 7 години, Ахмет Дарлишта за истото дело на 5,5 години, додека Фазли Суља, Сејфула Едемовски, Шеху Мухамед и Ресуљ Саити, осомничени за учество во странска војска, полиција, паравоени или параполициски формации се осудени на 5 години затворска казна.