Министерката за култура Елизабета Канческа-Милевска не го послуша Синдикатот на Македонската опера и балет. Наместо да им ги подобри условите за работа на уметниците, таа реши да ја реновира големата сала во МОБ. Тендерот беше објавен пред неколку месеци, а заврши вчера со објава на договорот со избраната фирма изведувач.
За реновирање на салонот на Македонската опера и балет, годинава од буџетот ќе се потрошат 1 милион евра. Зделката за градежните работи ја доби фирмата Промонтинг ДООЕЛ од Скопје, а реновирањето треба да го заврши во рок од четири месеци. На јавниот повик на МОБ имало две понуди, а според објавата на интернет страната на Бирото за јавни набавки, била избрана понудата на Промонтинг како најниска цена.
Канческа-Милевска овој зафат го најави во февруари, кога рече дека е изработен проект со кој е предвидена реконструкција на подот и на електричната инсталација, замена на околу 850 седишта и поставување на лед-екрани за претставите.
Синдикатот на МОБ побара од министерката прво да создаде основни услови за работа на уметниците, а потоа да го разубавува просторот во оваа институција.
„Синдикатот на МОБ апелира до Mинистерката да заземе активно учество во создавање на основни услови за работа на уметниците во институцијата. Под услови подразбираме: уредни гардероби и тоалети кои последниве години наликуваат на се освен на тоа за што се наменети, обезбедување потрошен материјал за инструменти кој го немаме земено повеќе од година и половина, костуми и фустани за јавни настапи, столови за оркестар и хор за јавни настапи и пултoви за ноти кои ќе обезбедат минумум светлина потребна за професионално извршување на нашите работни обврски.“, и напиша Синдикатот на Милевска по најавата за реконструкција на салонот на МОБ.
Уметниците упатија предупредување дека се на работ на трпението, со зголемен обем на работа кој паѓа врз нивниот грб, а со кој треба да се затворат финансиските дупки направени од раководството. Директорот на Македонската опера и балет Игор Дурловски не е во земјава и не одговори на прашањата на НОВАТВ дали по овој тендер, ќе почнат да се решаваат и проблемите со кои секојдневно се соочуваат уметниците во неговата институција.
На крајот на април вработените во институциите од областа на културата, излегоа на протест пред Министерството за култура со мотото – Културата не ви ја трпи тортурата. Тие бараат повлекување на законските измени од 2014 година од Законот за култура, преговори за колективен договор со кој ќе се унапреди културата со сите дејности и покачување и нивелирање на платите во културата и достоинствен статус на сите вработени во културата