Завршија разговорите за разликите околу името во Њујорк, меѓу пратеникот на ОН Метју Нимиц и претставниците на Македонија и Грција, Зоран Јолевски и Адамантиос Василакис.
На прес-конференцијата по средбата амбасадорот Нимиц изјавил дека се разговарало за конкретни предлози и оти очекува двајцата посредници да ги пренесат на своите Влади.
Нимиц потенцира дека идеите што ги претставил се едно ново мислење од негова страна и изрази надеж дека двете страни ќе пронајдат позитивни елементи.
– Ги замолив амбасадорите Јолевски и Василакис да ги пренесат на своите Влади. Предлозите се конкретни и се надевам дека двете страни ќе се посветат на изнаоѓање решенија, изјави Нимиц.
Амбасадорот Нимиц го потенцираше високиот интерес кој владее за овие разговори во ОН, подвлекувајќи дека потсекретарот на ОН Џефри Фелдсман присуствувал на разговрите, што преставува прв ваков случај.
– Во текот на разговорите не посети потсекретарот Џефри Фелдсман да го изнесе и неговото мислење и да ги увери сите дека и генералниот секретар Бан ки Мун е лично заинтересиран за ова прашање и дека се надеваме дека ќе биде изнајдено решение, изјави Нимиц.
Посредникот Нимиц дополнително потенцираше дека и многу од европските земји и САД се заинтересирани за текот на разговорите. Оваа изјава ја даде во контекст на прашањето дали очекува разговорите да влијаат врз скорешната одлука на ЕУ за предлогот за отворање преговори.
Нимиц најави дека следната средба во овој формат може да се очекува за околу два месеца без да прецизира дали таа ќе биде во Њујорк, во Македонија и Грција или на локација во Европа.
Во меѓувреме Македонија е подготвена за посета на Нимиц, а Грчкиот учесник во разговорите Василакис потенцира дека средбата може да се очекува по 5 мај и дека една од можните локации е и Брисел.