Во населбата Средно Нерезе вчера вечер се појавиле опасни волци кои “влегле во дворови на жителите пришто е убиено едно домашно куче-загар, а во соседниот двор е изедено едно домашно животно-коза. Жителите на Нерези забележале голем црн волк кој ги нападнал и куќите од горно Нерези и предизвикал паника меѓу животните и жителите на овие населби”, предупредува Општина Карпош.
Општината бара од граѓаните да бидат внимателни и да избегнуваат ноќни прошетки по Водно: “Ова не е прв пат во Општина Карпош “гости” од планината Водно да се спуштаат и да напаѓаат домашни животни меѓу жителите”.
Според ловците, волци се појавуваат од време на време во потрага по храна и на места каде што има смет и напаѓаат кучиња скитници или други животни. Во ова подрачје на Водно е забранет лов за кој е потребна посебна дозвола што ја издава Министерството за земјоделство и шумарство.
Волците во принцип бегаат од луѓето, велат ловците со кои разговаравме, но се разбира дека претпазливоста е повеќе од неопходна и препораките на Општината треба да се почитуваат.
Во Европа волците се заштитени со Конвенцијата од Берн од 1979 година а во ЕУ волкот е дел од приоритените видови диви животни кои треба да се заштитат. Што значи дека земјите треба да внимаваат на заштитата на овој вид.
Во Македонија популацијата на волците е се уште голема. Тие предизвикуваат значителни штети во стопанството, па ловот на волци е се уште дозволен. Според некои експерти во Македонија се ловат околу 350 волци годишно а државата тоа го стимулира со исплата на 50 евра по застрелан волк.