Специјалното обвинителство на Косово покрена истрага против пратеникот на Демократската партијата која е на власт, Адем Грабовци заради сомнеж дека ја злупотребил службената положба во 2011 година. Обвинителството се сомнева дека пратеникот вработил одредени луѓе во јавни установи. Истрагата започнала врз основа на прислушувани телефонски разговори, објави косовскиот портал Инсајдери.
Грабовци поднесе оставка во Собранието на Косово, а група граѓани бараат оставка и кривична одговорност од сите кои се инволвирани во овој скандал.
Порталот најави дека ќе објавува и понатаму аудио снимки од прислушувани разговори, а сопственикот Вехби Кајтази најави дека постојат неколку стотини снимки кои се однесуваат на мала група луѓе од ДПК, за која тврди дека ја имаат контролата во цела држава.
„Оваа група одлучува кој ќе биде претседател, кој член на одборот или директор на некое јавно претпријатие. Тие одлучуваат за се и ниедно вработување или именување не може без нивна дозвола. Тие имаат големи влијание во правосудството, ги именуваат судиите и обвинителите. Таа група имаат влијание на косовската полиција и на медиумите“, вели Кајтази.
Грабовци си даде оставка по објавувањето на разговорите, но тврди дека ќе го тужи порталот заради објавување на приватни разговори. Од судот бара да се забрани објавувањето на прислушуваните разговори и најави дека ќе бара надомест на штета.