Станарите од неколку згради во Центар, во населбата Капиштец, утрово утврдиле дека ниту еден од лифтовите не работи.
Од куќните совети за Телма велат дека не станува збор за обичен дефект кој би можеле самите да го отстранат, туку за стручна диверзија со цел да се намали излезноста на гласањето.
Станува збор за згради со над 10 ката, во кои живеат по околу 500 жители и во кои има и постари луѓе кои не би можеле да одат пеш по скалите.
Освен поплаките на граѓаните, од една од партиите на кандидатите за градоначалник велат дека станува збор за намерно расипување на лифтовите со цел да се намали излезноста на гласањето.
Во Центар медиумите информираат и за намерно бушење на гуми на автомобилите, со цел да се спречат граѓаните да гласаат.
Како што соопшти невладината ЦИВИЛ, во општина Центар во текот на ноќта и утрово имаше и лажен пропаганден материјал преку кој гласачите се дезинформираат дека гласањето е идната недела, а информацијата била напишана на идентично ливче на кандидатот на една политичка партија.