Bниманието ми го привлече едно интервју, тукушто објавено на сите провладини портали со економската директорка на една скопска клиника. Гледам, читам и не ми се верува. Исто интервју во сите портали. Политички маркетинг! Како од нејзиното доаѓање пред неколку месеци да почнала да работи клиниката за чие функционирање знам многу во последните 20 години. Прашањата нарачани, да му е срам на човек да чита.
А, да пред да заминам на одмор напишав колумна каде објаснив дека докторите на оваа клиника се шокирани од однесувањето на истата таа директорка за која рекоа дека ги бркала пациентите од ходник доколку дошле порано од закажаниот преглед. Ги бркала по пеколно жешкото да чекаат надвор иако докторот можел, сакал и имал слободен термин да ги прими. Така некои морале да чекаат и до 14 часот да влезат на закажано според „Мој термин“. Така кажаа докторите и беа многу револтирани и вознемирени од тоа. Македонско здравство, какви луѓе те водат?
Туку, да го прашам министерот за здравство Никола Тодоров кога ќе бидат новите вработувања што ги најавуваше. Вкупно 350. Нешто е тивок во последно време. Или можеби се радува што маслото од канабис за медицински цели конечно ќе го има во аптеките, со доцнење од пет месеци откога го најави. Нека се радува, има и зошто.
Во време на поплави, кога се повеќе од можни заразни болести медицинските сестри во Одделението за кожни болести во болницата „8 Септември“ потпишуваат Петиција. Тие велат дека не можат да издржат бидејќи се многу малку и постојано се на работа, многу често дежураат. Со Петицијата која ја подготвуваат да ја однесат кај директорот поставуваат ултиматум: Да се примат на работа уште медицински сестри или тие колективно ќе ја напуштат работата во кожното одделение!
И сега Тодоров што правиме?
Имате ли во план нови вработувања на медицински сестри или чекате да дојде предизборието? Зашто ова не може да чека!
Надвор е неподносливо топло, а пцовисаниот добиток уште плива во поплавените подрачја. Заразата тропа на врата, а кожното одделение во„8 Септември“ е пред затварање. И да не е, нема капацитет за работа. И пред извесно време, веднаш по поплавите пациенти беа фрапирани кога наишле на затворени врати на кожно бидејќи вработените биле на колективен одмор. И фрлаа со „дрвја и камења“ по социјалните мрежи по персоналот. Ама е еве, работата била таква. Си земале одмор кој што законски им следува. А, на одделението немало кој да остане да работи.
Во време на вонредна ситуација министерот за здравство не мрднува со прст да стори нешто. Можеби нема време за министерските работи бидејќи е вицепремиер? Но, ете има кабинет со еден куп луѓе. Платени од наши пари. Тие сигурно следат се што се случува во здравството, до нив стигнуваат сите поплаки од директори и пациенти. Можно ли е да се распореди кадар од таму каде што има повеќе медицински сестри, да се примат нови или едноставно да дојдат на помош од други клиники? Ситуацијата во болницата е ургентна!
Болницата „8 Септември“ има потреба од медицински сестри. Итно и неодложно, не само на кожно! Како да функционираат кога имаат недостиг од кадар, а работат со полна пареа? Само од почеток на годината до сега во болницата биле извршени 9650 прегледи, за разлика од лани кога во текот на целата година имало 6500 прегледи. Тоа се по 1200 прегледи месечно! Болницата кубури со одредени лекари специјалисти, имаат огромен недостиг од медицински сестри, административен кадар, општи работници, хигиеничари. А, вие таму од министерството им праќате специјалисти кои веќе ги имаат. Седум ендокринолози на девет болнички кревети! Тоа го нема никаде во свет. Срамота!
Како тоа да не ги прашате од какви лекари специјалисти имаат потреба? И сакате да ви веруваме дека нема партиски вработувања? Дека имате план и стратегија за вработување на специјализантите?
Да, познато ми е за некој ден ќе излезете со прес конференција за третата група вработувања на специјализанти. Гајле ви е. Вие ги избирате, болниците им обезбедуваат плати. Дали им требаат тие специјалности, тоа не е важно!
А, ние еве чекаме да одговорите што се случува со оние ветените нови 350 вработувања? И дали болницата „8 Септември“ ќе добие кадар што и е навистина потребен. Не партиски. Ќе добијат ли и другите болници кадар како што им е потребен или повторно ќе трупате луѓе кои се изгубени во простор и време. Тоа е суштината! И тоа е основата за да успее да се одржи македонското здравство. Во, спротивно ќе го останат само нарачните интервјуа да ве спасуваат од вистината, од погледите на болните, од самите себе.