Пустец повторно во Центар. Жителите од малото албанско село од Мала Преспа попладнево масовно почнаа да пристигаат во Центар на гласачките места каде се регистрирани во избирачкиот систем. Како на пример ова семејство овде.
Членови на изборната комисија внимателно ги гледаа личните карти и се интересираа кога се издадени. Личните карти на овие луѓе се издадени на 31 Јануари. Родното место според податоците од нив им е Албанија, а адресата Димитрие Чуповски, една од веќе популарните улици од вториот изборен круг со десетици регистрирани жители или новопечени граѓани на општина Центар од Пустец.
Млади луѓе ги чекаа гласачите надвор и ги спроведуваа до местата каде требаше да ги соберат возилата кои ги разнесуваа на гласање. Бегајќи од новинарите, луѓето се вртеа во круг низ центарот на градот. А потоа автомобил набрзина ги собра и заминаа.
Третиот изборен круг наликува на вториот. Тензично и со расправии помеѓу членовите на
комисијата поради новите гласачи од Пустец беше слика во речиси сите избирачки места.
Аферата со жителите од Пустец регистрирани на адреси во Скопје во станови претежно во државна сопственост отвори многу прашања – кој ги издал личните карти, како општествените станови станале нивни места на живеење и зошто сите речиси во ист ден добиваат лични карти и се регистрираат во гласачките списоци – прашања со кои досега ниту една институција не се позанимава.