Граѓанската асоцијација МОСТ го следеше гласањето на 21-ви април со 130 набљудувачи кои беа распоредени на 29-те гласачки места во општина Центар, 9-те гласачки места во општина Струга, како и едното гласачко место во општина Ѓорче Петров. Набљудувачи на МОСТ, исто така го следеа и вториот круг на гласање на 20 гласачки места од вкупно 39 гласачки места во општина Долнени.
Според извештаите и информациите добиени од набљудувачите и од 6 регионални координатори, прелиминарната оценка на Граѓанската асоцијација МОСТ е дека гласањето на 21-ви април беше спроведено ефикасно, но во одредени избирачки места и надвор од нив, во тензична атмосфера која не придонесува кон градење на демократска култура и позитивен имиџ за изборниот процес во Република Македонија.
Како и во претходниот изборен круг, на одредени избирачки места во општина Центар се појавиле лица за кои имало сомневање дали живеат во општината. Сепак, фактот што Избирачкиот список повторно предизвика проблеми, а со тоа и недоверба во целокупниот изборен процес, укажува на потребата од итна интервенција која ќе придонесе кон отстранување на сите аномалии во Избирачкиот список, како и утврдување на одговорноста за евентуалните пропусти при ажурирањето на истиот.
Институциите надлежни за ажурирање на Избирачкиот список се: Министерството за внатрешни работи, основните судови (во делот на обезбедување податоци за деловно неспособни лица и лица во куќен притвор), Државниот завод за статистика, а Државната изборна комисија е формално надлежна за неговото водење.
Во текот на денот во општина Центар беа забележани случаи на обиди за манипулација на граѓаните за денот на одржување на изборите, обиди за демотивирање и обесхрабрување на граѓаните да излезат и да гласаат преку саботажи и методи кои воопшто не придонесуваат кон градење на демократска култура и позитивен имиџ за изборниот процес во Република Македонија.
Што се однесува до останатите општини во кои се спроведуваше гласање, во општина Долнени е забележано семејно гласање, додека пак на избирачките места во Струга и Ѓорче Петров гласањето генерално се одвиваше без нерегуларности.
Во однос на одлучувањето по приговорите за вториот изборен круг, овој пат Државната изборна комисија го поправи впечатокот од првиот изборен круг и беше конзистентна во одлучувањето по истите. Но, истото не може се каже и за Управниот суд. Имено, Управниот суд одлучи да преиначи дел од одлуките на Државната изборна комисија.
Неконзистентноста во начинот на постапување по тужбите за првиот и вториот изборен круг, според МОСТ, е нешто што придонесува кон намалување на довербата во оваа институција, како крајна инстанца во процесот на заштита на избирачкото право.