Вчера во доцните попладневи часови, екипи на ЈП Паркови и зеленило сечеа дрва во близина на седиштето на ВМРО ДПМНЕ во центарот на градот.
Како што информира портпаролот на градоначалникот Коце Трајановски, Неделчо Крстевски, од јавното претпријатие имаат уредно решение за сечење на дрвјава издадено од општина Центар, во кое стои дека на овој простор ќе се гради нов објект. Во управата на градот Скопје не знаеа да ни кажат за каков објект станува збор. Во меѓувреме стигна соопштение од ВМРО-ДПМНЕ:
„Врз основа на Одлуката на Извршиот комитет на ВМРО-ДПМНЕ, одржан на ден 25.06.2012 година и Одлуката на Централниот комитет на ВМРО-ДПМНЕ, одржан на ден 01.07.2012 година, ВМРО-ДПМНЕ распиша јавен повик за доставување на понуди за соинвеститор за изградба на градежен објект на земјиште кое е во сопственост на политичката партија ВМРО-ДПМНЕ“ се вели во соопштението од оваа партија во кое понатаму се објаснуваат повеќе детали за овој градежен зафат.
„Согласно условите пропишани во јавниот повик тоа земјиште се гради во соинвеститерство, односно понудувачите понудија процент од бруто развиената површина кој ќе му го отстапат на сопственикот на градежното земјиште(во случајов ВМРО-ДПМНЕ), што воедно беше еден од основните критериуми за избор на најповолен понудувач, а кој процент не смее да биде под 30% од бруто развиената површина. Што значи приватен инвеститор го гради земјиштето во сопственост на ВМРО-ДПМНЕ за свои комерцијални цели, а за возрат треба да отстапи најмалку 30% од корисната изградена површина на ВМРО-ДПМНЕ. Во овој случај ВМРО-ДПМНЕ нема никакви трошоци за изградба на објектот. Ваквата одлука е донесена пред се поради старата и дотраена повеќедецениска зграда, повеќекратните трошоци за нејзиното одржување кои се зголемуваа со оглед на нејзината дотраеност како и недостатокот на просторни услови. Новиот објект ќе ги запази сите градежни правила, стилски и естетски ќе го разубави тој дел од центарот на градот“ се вели во соопштението на ВМРО ДПМНЕ.
Според условите дефинирани за оваа градба станува збор за објект од комерцијален какартер.