Согласно критериумите од проектот за плаќање по успешност, Министерството за здравство ја објави листата на 100 најдобро рангирани доктори во јавните здравствени установи.
Според Министерството, станува збор за најдобро рангираните 100 доктори за месец февруари од универзитетските клиники, специјални, клинички и општи болници во државата.
Критериумите покажале дека докторите кои се наоѓаат на листата најмногу придонеле за обезбедување подобри и поквалитетни здравствени услуги за пациентите и за унапредување на здравствениот систем во Македонија.
Првите 10 најдобро рангирани доктори-специјалисти, согласно критериумите од проектот за плаќање по успешност се: д-р Гордана Оранска од Клиниката по хируршки болести „Св. Наум Охридски“, проф. д-р Владимир Поповски од Клиниката за максилофацијална хирургија, д-р Игор Пеев од Клиниката за пластична и реконструктивна хирургија, д-р Емилија Влашки од Клиниката за детски болести, Слободан Дамјановски од Клиниката за неврохирургија, д-р Билјана Кузмановска од Клиниката за трауматологија, ортопедски болести, анестезија, реанимација и интензивно лекување и ургентен центар, д-р Магадалена Генадиева Димитрова од Клиниката за гастроентерохепатологија, д-р Сузана Николовска од Клиниката за дерматовенерологија, д-р Јасмин Циривири од Градска општа болница „8 Септември“, и д-р Сашо Ценов од Клиничка болница-Штип.
Сите наградени доктори ќе станат дел од „Клуб 100-најдобри доктори“, и ќе добијат парична награда од 30.000 денари а истовремено ќе добијат право за вршење дополнителна дејност во матичната институција каде што работат, како и во останатите јавни здравствени установи.