Веднаш по паузата која ја даде претседателот на Надзорната комисија за поплавите Панчо Орцев, ВМРО-ДПМНЕ и СДСМ одржаа прес-конференции за свое толкување каде запна работата при утврдување на процесот на сослушување.
-Груевски, Тодоров и Трајановски нема да избегнат одговорност. Одолговлекувањето на работата на надзорната комисија покажува до каде оди неодговорноста на овие луѓе. Во поплавите, меѓу 23 жртви имаше и бебиња. Институциите потфрлија, кадрите на Груевски, кој десет години е на власт мора да се соочат со одговорност, изјави Петре Шилегов, пратеник од СДСМ.
Во однос на тоа зошто не го поддржуваат предлогот на ВМРО-ДПМНЕ како да се сослушуваат сведоците, Шилегов вели пред се, процесот е утврден во 33 чекори и невозможно е во 3 минути Чавков или останатите да дадат одговор на прашањата кои треба да им се постават.
Според Шилегов, овој предлог на ВМРО-ДПМНЕ е лажно наметнато барање. Веднаш по Шилегов, прес-конференција одржа и поранешниот министер Љупчо Димовски кој рече дека самото тоа што 40 членови од мнозинството и 20 функционери денеска се присутни во салата, покажува дека тие сакаат да се дознае вистината.
Како што вели Димовски било кој предлог шо би го дал СДСМ, тие би го прифатиле, бидејќи во нивни интерес било да се дознае вистината, затоа што постојано биле обвинувани.
На прашањето на НОВА, ако процесот на сослушување е веќе утврден, зошто тогаш се потребни нови начини на сослушување, Димовски одговори дека претходното искуство на комисии не им дава на право да работат по тој принцип, бидејќи се одолговлекувале прашањата и одговорите надвор од утврдените правила.