Работиме, работиме, кога ќе има нешто ќе соопштиме, ваков одговор дава скопското обвинителство на прашањето до каде се со истрагата за загинувањето на Никола Младенов.
Нова, но и новинари од други редакции прават обиди да добијат повеќе информации, но секретарката во скопското обвинителство која е единствента која разговара со новинарите во отуство на службено лице за односи со јавноста на сите им го дава истиот одговор
“Се уште се работи на предметот , ќе знаете кога ќе има нешто, работи обвинителката”, вели секретарката во скопско обвинителство.
Извори за Нова во обвинителството кои инсистираа да останат анонимни велат дека во обвинителството сега практично не се работи ништо бидејќи сите се окупирани со заминувањето на претходната в.д претседателка Наталија Тасевска во вишото обвинителство и можното назначување нов човек на таа позиција.
“Таму сега има в.д обвинителка на таа позиција, која е пред пензија и во тек е агитирањето и борбата за функции. Јас колку што знам, предметот за кој прашувате не се работи со интензитетот и вниманието кое го заслужува”, вели вработен во обвинителството за Нова.
Обвинителството го превзема предметот два дена откако истражниот судија Јосифов ја затвори истрагата, односно на 11 Април овој месец. Иако беше најавено дека веќе следната недела по превземањето на случајот ќе има информации од страна на обвинителството за јавноста, тоа досега не се случи. Постојат две опции – обвинителството да ја констатира состојбата која од истражниот судија, односно дека се работи за класична сообраќајна несреќа или пак, да побара дополнителни проверки, кои доколку покажат дека има докази за вмешаност на други лица во несреќата, и формално да се побара отворање на кривична истрага.
Семејството на Младенов досега ниту еднаш не било контактирано ниту од истражниот судија, ниту од обвинителството иако утре ќе се наврши еден месец од неговата смрт.
Во овој месец надлежните, барем засега, не направија дополнителни напори да ги одговорат прашањата поврзани со смртта на Младенов кои останаа да висат во воздух.
Како Младенов е лоциран преку мобилниот телефон, а мобилниот не е пронајден?
Дали се побарани телефонските листи од неговите разговори непосредно пред несреќата за да се види каде бил Младенов?
Како е воден случајот од истражниот судија ако се имаат во предвид написите во дел од медиумите кои тврдеа дека самите наоѓале докази (на пример белешки од патарини и делови од автомобилот)?
Како телото на Никола Младенов завршило надвор, на десетина метра од автомобилот и уште поапсурдното – како летнало од задното стакло? Експерти во јавноста веќе излегоа со тврдења дека праксата не познава излетување од задно стакло.
Кога надлежните органи ќе ја покажат скицата на движење на автомобилот?