Авторката на Воинот на коњ, Портата Македонија, фонтаните и скулптурите со Филип и Олимпија (во различни варијанти), како и други дела од проектот Скопје 2014 во интервју за “Утрински весник” тврди дека од посочениот хонорар од речиси три милиони евра, таа земала само 10 проценти, а останатото отишло на мајстори, материјал и изведувачи. За портата Македонија пак, вели дека била и во минус и се прашува дали заработила едвај 500 евра хонорар.
“Какви три милиони евра? Едвај десет отсто од нив остануваат за авторот на проектот. На скулптурите работев речиси шест години, некогаш од утро до утро, често ги запоставував и децата поради работа… Може да се пресмета дека месечниот надомест, всушност, би ми бил колку една посилна просечна плата во Македонија. На удар сум на политички инсценирани напади, јавноста и граѓаните добиваат сосема погрешна перцепција”, вели Валентина Стеваноска во разговор со Утрински весник.
Според овие тврдења, Стевановска земала речиси 300 000 евра за шест години. Ако сумата се подели на 72 месеца излегува дека таа земала месечна просечна плата од 4100 евра. Таа во интервјуто за Утрински весник раскажува како колегите од Италија и се чуделе на паметот како се нафатила да работи за толку малку пари.
Исто како Стефановска, и авторката на врбите во Вардар Искра Димитрова во разговор за Нова тврдеше дека таа зела хонорар од само 500 евра, а не 65 000 евра. Остатокот и таа го дала за материјални трошоци и човечки ресурси.
Министерката Елизабета Канчевска Милеска во понеделникот во владата одржа прес конференција или, како што таа вели, отчет за потрошените пари за проектот Скопје 2014. Отчетот содржеше суми на потрошени средства кои Канчевска Милевска ги читаше точно два часа и триесет минути. Но, повторно не беа приложени документи, како договорите со изведувачите, авторите, фактурите, критериумите во кои се бирани и условите во кои се потпишувани договорите, а не беа именувани и сите фирми кои работеле.
Она што беше очигледно е дека на авторите им се префрлале пари за да ги платат материјалите, мајсторите и останатите трошоци, но не беше приложен отчетот, односно фактурите од исплатите кој авторите го дале, доколку го дале, пред Министерството за култура или општина Центар.