Носителот на советничката група на СДСМ во Советот на општина Карпош, Иван Спировски, денеска демантираше дека постоел каков било обид од страна на Стевчо Јакимовски за некаква соработка со советничката група на СДСМ во Карпош.
Тој во изјава за новинарите пред општината праша – кој може после сите постапки на градоначалникот на оваа општина, Стевчо Јакимовски да му верува дека се грижи за граѓаните, кога единствениот негов мотив во политиката се личните и бизнис интереси.
Спировски рече дека вчера се потврдило тоа што за целиот тек на кампањата го говореле, па коалицијата меѓу Стевчо Јакимовски и ВМРО-ДПМНЕ се официјализирала и конечно станала јавна.
Градоначаликот на општина Карпош, Стевчо Јакимовски вчера соопшти дека пропаднал обидот за соработка со СДСМ и дека ќе започне разговори за коалицирање со советничката група на ВМРО ДПМНЕ.