По 2 години и 3 месеци Управата за заштита на културно наследство го избра идејното решение за ревитализација на скопската тврдина Кале.
Според податоците од Бирото за јавни набавки, Управата го избрала идејното решение на фирмата “Неимар“ во сопственост на архитектот Зоран Петров кој беше проектант и на Музејот на македонска борба.
Конкурсот беше објавен во февруари 2011 година, само неколку дена пред големите инциденти на Кале кои избувнаа поради најавите дека на скопската тврдина ќе се гради музеј -црква. Металната конструкција за таканарачената Црква – музеј, почна да се издигнува на темелите од средновековна црква од 14. век, а во неа се планираше да се изложуваат артефакти пронајдени на тврдината. Но, нејзината изградба беше прекината по инцидентите.
Нова ги праша надлежните што точно предвидува ревитализацијата и што ќе се гради на Калето.
Прв го побаравме директорот на Управата Паско Кузман кој за Нова изјави дека се работи за грешка на Бирото за јавни набавки.
-Немаме распишано таков конкурс, пред неколку години имавме започнато процес за конкурс за ревитализација, но сега приоритет ни се конзервацијата, реставрацијата и реконструкцијата на трите објекти каде што ќе бидат сместени музеите на праисторискиот, средновековниот и на отоманскиот период. Откако ќе заврши таа фаза, тогаш може да се зборува за ревитализација, вели Кузман.
Но, одговорниот за јавните набавки во Министерството за култура Саша Крстевски вели дека не се работи за грешка, туку директорот Кузман заборавил поради многубројните обврски.
-Директорот Кузман има многу обврски и веројатно заборавил дека има распишано ваков конкурс. Ние имаме законска обврска да ги објавиме резултатите во Бирото за јавни набавки. Конкурсот бил распишан 2011 година, а за резултатите било одлучено пред неколку месеци, вели Крстевски.
На конкурсот имало само два кандидати.
Инаку, Управата за заштита на културното наследство на 15 април објавила оглас за избор на компанија што ќе изведува конзервација, реставрација и реконструкција на Музејот на праисторискиот период на скопската тврдина Кале.