Новиот градоначалник на Центар, Андреј Жерновски, во неделното интервју на Радио Слободна Европа објавува дека до него стигнале понуди од урбаната мафија за да замолчи:
-Воопшто не ме интересираат понудите на оние што градат коишто стигаат до мене во однос на тоа да замолчам или да не гледам што се случува итн. Јас не сум избран, а добив сериозна поддршка од жителите на Центар, за да ја поддржувам градежната, урбана мафија, туку реков и сега ќе потенцирам дека урбаната мафија ќе мора да си најде друга општина, нема што да бара во Општина Центар.
Што се однесува до спомениците на албанските херои, Жерновски вели дека за него сите споменици се еднакви:
Не ги гледам спомениците дали се на македонски личности од историјата, или се албански, турски, ромски и така натаму. Мене ме интересира постапката, мене ме интересира зошто се прави тоа, на кој начин е тоа направено, ме интересира дали тоа чини толку колку што чини.
Градоначалникот на Центар го отвора прашањето на авторските хонорари, кои според уметниците воопшто не кореспондираат со наводите на министерката Канчевска:
-Многу интересен момент е тоа што не јас, туку самите автори кажуваат дека воопшто не се исплатени оние суми кои што беа наведени на фамозната прес-конференција на министерката за култура и на претходниот градоначалник на општина Центар, господинот Тодоровиќ. Очигледно дека самите автори, и тоа оние со кои власта самата се фалеше, кажуваат дека воопшто не е точно дека добиле толкава сума.
Се поставува прашањето каде одат парите? Ние кога би имале обвинителство во оваа држава кое што функционира, веднаш би морало да се отвори предмет, вели Жерновски во интервју за Радио Слободна Европа.