Претседателот Ѓорге Иванов бара јавно извинување од ВМРО-НП до сите бранители, до членовите на семејството на претседателот што во 2001 беа на браникот на татковината, како и извинување до него лично како граѓанин и како претседател на Република Македонија.
„Во спротивно, ВМРО-НП ќе се соочи со тужба за клевета“, соопштува Кабинетот на претседателот, по обвинувањата на партијата дека Иванов бранителите за време на конфликтот во 2001 година, ги нарекувал убијци и криминалци.
„На лидерот на ВМРО-народна партија би му порачале наместо да шири клевети од најнизок вид, да размисли за своите постапки во 2001, за договорите за поделба на државата и размена на население и територии“, велат од претседателскиот кабинет.
Партијата ВМРО-НП не се повлече од своите ставови за улогата на Иванов во конфликтот 2001 година
„По повод реакцијата на господинот Горги Иванов, ВМРО-Народна партија му порачува слободно нека отпочнува какви сака процеси затоа што постојат многу новинари, но и јавни политички личности кои ги убедувал во тие негови ставови изнесени во нашето претходно соопштение.
Исто така ке му ги посочиме и луѓето преку кои лобирал за неговиот брат кој бил мобилизиран, преку врски да биде повлечен додека вистинските бранители гинеа“, пишува во соопштението на ВМРО-НП.