Комисијата за ревизија од денеска почнува да ги “чешла” документите од проектот Скопје 2014 во општина Центар. Градоначалникот на општината, Андреј Жерновски го презентираше составот на комисијата за ревизија. Слаѓана Тасева, поранешен претседател на Антикорупциската комисија и претседателка на македонскиот огранок на меѓународната организација Транспарентност Интернешнл заедно со поранешниот претседател на
Антикорупциската Драган Малиновски ќе ја вршат ревизијата и анализата на достапната документација од проектите од Скопје 2014 во реализирани преку касата на општина Центар. Тие треба да оценат како се одвивале набавките и постапките за проектот и дали доследно се почитувале законите.
Првиот прелиминарен извештај ќе биде готов за 90 дена, додека финалниот се очекува да биде завршен за шест месеци.
Покрај работата на оваа независна комисија во општинат Жерновски ќе поднесе барање за ревизија и до Државниот завод за ревизија и до меѓународна ревизорска куќа.
И Тасева и Малиновски изјавија дека ќе работат професионално и без политички притисоци.
-Очигледна е потребата од оваа ревизија, поради тоа што за периодот на имплементација на проектот Скопје 2014 граѓаните беа хендикепирани затоа што не им беа достапни податоците околу начинот, постапката и финансиските трансакции при нивната реалиција.
Ова е обид транспарентноста која изостануваше за тој период сега да им ја овозможиме на граѓаните – рече Малиновски.
-Сето тоа ќе се работи многу професионално, врз основа на сите постоечки закони и процедури. Она на што инсистиравме и за што најпрво се договоривме е дека ќе биде обезбедена апсолутна транспарентност и во секоја фаза од постапката граѓаните ќе бидат информирани, изјави Тасева.
Градоначалникот одлучи да ја одржи прес конференцијата во собата каде се чува документацијата од Скопје 2014. Тој забележа дека тоа е преградена соба која порано била дел од поголема просторија и дека е единствената соба во општината која има две врати, односно врата со излез директно на улицатата надвор од општината.
-Не сакам да алудирам на ништо, и јас како и граѓаните само слушав гласини дека во помеѓу првиот, вториот и третиот изборен круг од општината се изнесувале документи, но тоа, сепак, се шпекулации кои јас не можам да ги потврдам засега, рече тој.
– Тоа вопшто не го правам поради политички реваншизам, туку затоа што сите, како политички паретии и како институции, барем декларативно се залагаме за транспарентност во нашето работење. Од овој момент сите информации ќе бидат достапни до заинтересираните граѓани, новинари, институции или невладини организации. Нема да се работи како што досега се работело, при што беше грубо прекршен законот за слободен пристап до информации. Од денеска, кој сака да има пристап до овие информациим, ќе го има овој пристап – рече Жерновски.