Министерството за надворешни работи на Бугарија не ја коментира изјавата на американскиот конгресмен Дана Рорабакер за поделбата на Македонија.
– Ситуацијата на Балканот традиоционално е во фокусот на многубројни изјави за јавноста. Бугарија има принципиелна и конзистентна политика за европската и евроатлантската интеграција на сите држави од Западен Балкан, ја пренесува агенцијата БГНЕС изјавата од Министерството за надворешни работи во Софија во врска со предлогот на Рорабакер за поделба на Македонија меѓу Косово и Бугарија.
Грчките медиуми пренесувајќи го интервјуто на Рорабакер за „Визион Плус“ од Тирана коментираат дека „не е прв пат американскиот фактор да ја разниша дополнително тензичната клима во Скопје“, објавува Си Ен Ен на грчки јазик, потсетувајќи дека група републикански конгресмени го обвинија амбасадорот на САД Џес Бејли за мешање во внатрешната политика на државата.
Обединетата македонска дијаспора пак побара претседателот на Конгресот, Пол Рајан и лидерот на мнозинството во Конгресот, Кевин Мекарти итно да го отповикаат Рорабакер од функцијата претседател на Поткомитет во Конгресот, бидејќи како што наведуваат во писмената реакција „со крајно неодговорниот напад против Република Македонија и повикот за нејзина поделба конгресменот уште еднаш се посрамотил сам себе, неговите гласачи и партија“.
Го повикуваат претседателот Доналд Трамп да упати критика кон Рорабакер за неговите коментари, а Американците со македонско потекло да ги контактираат нивните претставници и национални лидери со барање на одговорност за конгресменот.
– Членовите на Конгресот не би требало да бидат иницијатори на конфликти на Балканот. Тие не би смееле да се поистоветуваат со етно-националните агенди застапувани од страна на одредени балкански политичари. Македонија е суверена држава со постојани меѓународно признати обележани граници со сите свои соседи. Како таква, Македонија не припаѓа на Албанија, Бугарија, Косово, Грција, Србија или која било друга нација – држава, се вели во реакцијата од ОМД.
Претходно Стејт Департментот во изјава за Гласот на Америка на албански јазик укажа дека „САД гo признаваат и подржуваат суверенитетот и територијалниот интегритет на Република Македонија и оваа позиција не е променета“.