Асоцијацијата на европски новинари (АЕН) побара итно ослободување на новинарот Томислав Кежаровски, пишува во писмениот допис кој пристигна денеска. АЕН има статус на набљудувач во комитетот за медиуми при Советот на Европа и е една од многуте европски и светски организации кои се приклучија во протестот против апсењето на македонскиот новинар.
-АЕН е длабоко загрижена поради неодамнешните случувања во Македонија,каде истражувачкиот новинар Томислав Кежаровски е притворен и врз него наводно е вршено притисок да ги каже своите извори на информации за текст кој е напишан во 2008 година во кој тој открива идентитет на заштитен сведок.
-Неприфатливо е за земја која бара признанија за демократските стандарди и влез во Европската унија да го користи судскиот ситем за малтретирање и заплашување на новинарите на ваков начин. Македонија во моментов е рангирана на 116 место на последниот индекс на слобода на Репортери без граници, каде падна од 94 место кое го имаше претходно.
-Ова сигнализира брзо влошување во медумската средина во земјата, а притворот на новинарот Кежаровски демонстрира недостаток на потребната заштита на новинарите во земјата.
-АЕН изразува поддршка до колегата и неговото семејство и ги повикува македонските власти да го отфрлат случајот и да го ослободат од притвор без одложување, соопштуваат АЕН.
Истовремено, Здружението на новинар ги повика и амбасадите во РМ да се заложат за што поскоро расветлување на случајот со Кежаровски.
-Сметаме дека од аспект на етичкиот кодекс на новинарите, колегата постапил правилно кога ја објавил информацијата затоа што бранел легитимна цел, злоупотреба на заштитен сведок, во судска постапка за случај за убиство. Подоцна, заштитениот сведок јавно признал дека изјавата со која ги товарел осомничените како извршители на убиство, била изнудена од полицијата. Ако не ја објавеше информацијата новинарот, можело двајца граѓани да бидат осудени на долгогодишна робија во неразјаснети околности. Нашиот кодекс не обврзува да ги почитуваме законите на нашата држава, но исто така не обврзува да не криеме и да објавиме информација, која на било каков начин го загрозува јавниот интерес.
-Ве повикаме да се заложите за да се разјаснат околностите околу притворот на нашиот колега и да се дознае кои се обвиненијата против него, велат од ЗНМ.