За дипломатска офанзива на ДУИ за решение на името ширум Европа и преку Океанот, лидерот на ДУИ, Али Ахмети во разгоров за Дојче веле, објаснува:
– Со нашиот коалициски партнер имаме разбирање дека треба да се постигне компромис со грчката страна околу името. Ние како Албанци ги информиравме сите партии од македонскиот политички блок со кои имиња не се согласуваме. Не се согласуваме земјата да се нарекува Словенска Република Македонија, ни Национална Република Македонија, ниту пак да остане во употреба Поранешна Југословенска Република Македонија.
– Секој друг компромис за нас е прифатлив. На пример: Горна Република Македонија, Северна Република Македонија и сл. Моментно има една идеја од посредникот Нимиц и поради таа причина ДУИ ја има и оваа нагласена дипломатска активност, зашто оценуваме дека сега е моментот страните да седнат на заедничка маса. Јас, меѓутоа, не сум оптимист дека ова прашање ќе се реши сега во јуни со што би ги започнале преговорите за членство во ЕУ.
За воскреснатите тези дека сите Албанци на Балканот треба да живат во една држава – Голема Албанија, Ахмети со договор:
– Проектот за Голема Албанија е роден во големосрпските центри на Милошевиќ со цел да се отфрли легалното барање на Албанците кои тогаш живееле во поранешната Југославија.
– Приоритетните цели на Албанците кои живеат во Република Македонија се: целосната имплементација на Охридскиот договор, интеграцијата на земјата во НАТО и ЕУ, економскиот развој и градењето здрави меѓуетнички односи меѓу сите кои живеат во земјата: Македонци, Алабанци, Власи, Турци, Роми, Босанци…
Ахмети, вчера во Берлин имаше средби во германското МНР, а разговараше и со др. Хојсген, еден од најблиските соработници за надворешната политика на канцеларката Ангела Меркел.