Во доближувањето на Македонија кон ЕУ има стагнација. Блокадата останува, но и впечатокот дека Унијата не гледа сериозно кон Македонија, која нема ниту еден поддржувач во ЕУ, оценува за Дoјче Веле проф. д-р Хајнц-Јирген Акст.
„Мора да се констатира дека комесарите и Европската комисија не се тие кои конечно одлучуваат. Тоа се, како што знаеме, земјите членки на ЕУ. Тоа е состојба што и‘ оди од рака на Грција, зашто нема ниту една ЕУ држава која серизно го поддржува доближувањето на Македонија до Унијата. Тоа е трезвена анализа со која мора да се соочиме“, коментира професор Акст.
„Стагнацијата е вистинскиот збор што може да се искористи за да се дефинира доближувањето на Македонија кон ЕУ. Стагнација има на обете страни – и кај Унијата и кај македонското општество и политика. Во Унијата постои замореност и нема вистински напор да влијае да се надминат разликите околу спорот со името. Грција непроменето и натаму блокира.
Останатите европски држави немаат никаков интерес блокадата да ја отстранат. Од стана на Македонија гледам еден вид контрареакција на очекуваните сигнали од Брисел и од главните градови на водечките земји на Унијата.
Има свртување навнатре, враќање кон античкото наследство и зголемување на чувството дека Европа не гледа сериозно кон Македонија и не ги почитува дадените ветувања“, изјави за ДВ професор д-р Хајнц-Јирген Акст, добар познавач на Балканот и долгогодишен раководител на катедрата Жан Моне на Универзитетот Дуизбург – Есен.