Во МВР немаат официјална потврда од српска страна за затварање на границата во Табановце, за мигрантите. Според информациите кои ги добиле на граничниот премин, таму во моментот нема застој и досега никој не е вратен од граница.
„На граничниот премин Табановце никој не е вратен, нема официјална потврда од српска страна за затварање на границата“, изјави за НОВА портпаролката Лиза Бендевска.
Но, мигрантите не ја поминуваат легално границата во Табановце, велат од невладината организација Легис. Кога ќе се симнат од возот тие одат длабоко во шумата каде што чекаат момент за да преминат, нелегално.
„За што точно се работи ќе се знае дури вечер по пристигнувањето на возовите во Табановце“, вели Јасмин Реџепи од „Легис.“
На информацијата на НОВА добиена од дипломатски извори, дека Србија одлучила да ја затвори границата со Македонија, на Табановце и тоа е сторено утринава околу 7 часот, во УНХЦР велат дека немаат официјална информација за такво нешто. Објаснувањето на Србија за овој потег е дека во бегалскиот камп во Прешево повеќе нема место. Кампот е преполн и нема капацитет на прима нови мигранти.
Од УНХЦР посочуваат дека мигрантите се пуштаат во групи и кога ги има во голем број од српска страна, во кампот во Прешево, во еден момент се прекинува со нивно пропуштање. Но кога ќе се намали гужвата се пушта нова група, предност се дава на жените и децата.
Во Црвениот крст исто така велат дека нема застој на границата, а нивните активисти сега најмногу интервенираат кај хроничните болни, поради топлото време, во случаи со дијализа, луѓе со ампутирани екстремитети, со ортопедски помагала.
„Ние им даваме терапија која е доволна за да стигнат до следната дестинација каде што ќе им биде пружена помош. Сега интервенираме најмногу на хроничните болни, им носиме повеќе вода, а од утре ќе им бидат дистрибуирани хигиенски пакети на мажи, жени, деца“, изави за НОВА Сузана Тунева од Црвениот крст.
Од „Легис“ велат дека nивните активисти следат што ќе се случува вечерва. Дали станува збор за кратко затварање на граница или Србија се подготвува да го спречи влезот на мигрантите, останува да се види.
Во бегалскиот камп во Прешево секојдневно пристигнуваат од 800 до 1000 бегалци на кои им се издават потврди, а од 8 јули досега низ него поминале повеќе од 6 илјади луѓе. Мигрантите се стационирани или во меѓузоната или во Прешево.
Според српските медиуми таму населението несебично им помага на бегалците кои спијат на тротоарите пред куќите, како и во привремениот камп, нудејќи им купатила, храна и облека. Таму се и активистите на Црвениот крст и УНХЦР.
Српските медиуми пишуваат дека ѕидот кој се гради на унгарско-српската граница ќе им ја смени рутата на бегалците, односно ќе ги пренасочи влезот во Европската унија да го бараат преку Хрватска.