Чaс по природа и општество е темата на осмото по ред издание на АКТО Фестивалот за современи уметности кое годинава се одржува во периодот од 9 до 11 август, 2013 год. во Битола.
Во негови рамки се одвива кураторскиот проект “Живи библиотеки: Архиви на граѓанската непослушност”на Ивана Васева, Филип Јовановски, Јованка Попова.
Структурата на проектот подразбира две тематски целини, кои се одвиваа денес:
– Лекција број еден „Вагнер и Лист – Конструкции на современи митови“, која се однесува на литература поврзана со создавањето на современи митови и нивно распознавање и влијание во современиот македонски контекст и го отвора прашањето – Како и зошто имаме потреба од митови, кои се тие и зашто погрешниот избор и толкување претставуваат опасност во денешнината?
– Лекција број два “Захарија Шумљанска – Симбол на пожртвуваност и активизам“, во чиј фокус е литература која иницира и колерира со различни видови на граѓанско делување.
Во рамки на кураторскиот проект, се одржуваат и две читачки групи со гости од земјава и регионот како и повеќе уметнички проекти кои се од перформативен но и едукативен карактер.
Куратори на проектот “Куратори на проектот живи билиотеки: архиви на граѓанската непослушност” се Ивана Васева, Филип Јовановски, Јованка Попова.
-Идејата на лекцијата бр. Еден е да се формира библиотека составена од литература која што оди во насока на граѓанска непослушност, активизам и контраст на современи митови. Оваа библиотека ја формираат самите граѓани, и истата можат да ја користат за понатамошни настани организирани од страна невладини организации од Битола и останатите градови во Република Македонија.
На првите две лекции повикавме личности кои што сметаме дека можат да ни посочат литература која што е од голема општествено- политичка важност во однос на моменталната состојба, образложи за НОВА Ивана Васева, прокуратор на проектот “Живи библиотеки: Архиви на граѓанската непослушност”.
Искра Гешоска, културен деец и претседателка на Јадро, за НОВА вели дека нејзиниот фокус е во активизмот, во отпорот.
-Една од поделикатните теми за мене која што го достигнува врвот на својата актуелност е темата на активизмот. Јасно е дека живееме време на бескрајно незадоволство кога е нужно да се пружи отпор на тоа незадоволство. Но, што значи тој отпор? Главно имам впечаток дека отпорот е реактивен, а не проактивен.
Денес одлучив во рамките на овој фестивал да подарам книга која што се вика “Пофалба на љубовта” од Ален Бадју- зошто? Затоа што за мене вистинскиот активист е посветен љубовник. Тоа значи дека тој е храбар, спремен да експериментира, постојано буден, одговорен и грижлив за другиот.
Активизмот го поврзувам со една Хамлетовска позиција затоа што за мене најголемиот активист и парадигма за посветен активист е токму Хамлет бидејќи тој има љубов, лудило, посветеност, знаење, волја, копнеж и страст.
Тој е перманентно присутен во просторот и времето каде што сака да ги открие вистината и местото на подобриот свет. Токму затоа за мене тој е парадигма на активизмот, вели Искра Гешоска.
