Инспекторите секојдневно се на критичните точки во Скопје за загадување на воздухот. Веќе се казнети седум лица од општина Сарај, а Инспекторатот најавува поголеми акции во дворовите.
-Поголеми акции имаме во однос на дворовите. Има граѓани кои секаков вид отпад складираат во своите дворови за во зимскиот период тој да биде искористен како огревен материјал, информира главниот инспектор на Град Скопје Мирослав Богдановски, на денешната обука на инспекторите за инспекциски надзор во рамките на проектот за Платформа за почист воздух во градот Скопје, во организација на Зелен институт, кој треба да им обезбеди на граѓаните контакти каде да пријават палење отпад.
Онаму каде инспекторите ќе забележат таков опад влегуваат, се чисти дворот, а фактурата за чистење ја плаќа сопственикот на објектот.
Се влегува во секоја куќа, а граѓаните може да пријават ваков отпад анонимно.
Седумте лица кои се казнети во општина Сарај се поради палење земјоделски површини, а казната според Законот за управување отпад е до 1.000 евра. Досега најголем број поплаки има од општините Ѓорче Петров и Сарај.
Во однос на индустрискиот отпад, кој во неделата беше забележан во реката Вардар, Богдановски рече дека Инспекторатот на Градот Скопје ја завршил работата, а за санкционирање е надлежен Државниот инспекторат за животна средина.
-Инспекторите на Град Скопје, веднаш по случување на настанот во неделата излегоа на терен. Во рок од осум минути беше повикана акредитирана лабораторија. Односно лабораторијата на Водовод и канализација. Земавме примероци од седум точки по течението на реката Вардар, почнувајќи од Аеродром до Јурумлери. Од страна на Град Скопје е завршена целата процедура. Записникот заедно со извештаите е предаден на Државниот инспекторат за животна средина, за понатамошно испитување, вели Богдановски.
Тој потенцира дека се работи за индустриски отпад од „Арчерол Митал“.
-Претпријатието е со А интегрирана еколошка дозвола. Постапувањето во однос на таа инсталација е во надлежност на Државниот инспекторат за животна средина. Ние ги обезбедивме податоците, мерењата на водата и сите извештаи се доставени до него, вели Богдановски.