Дури 60 проценти од младите имаат некаков деформитет на рбетниот столб, а 80 проценти имаат проблем со стапалата. Најголема причина за ова се училишните клупи останале исти и за првачињата и за осмооделенците предупредуваат лекарите.
Министерството за образование не се интересира за решавање на проблемот иако во повеќе наврати е укажувано дека тоа е еден од начините за превенција за да се застане на патот на оваа алармантна состојба во Македонија велат лекарите.
-Повеќе пати сме укажувале на овој проблем. Училишните клупи не се прилагодени на возраста на децата и во нив седат неправилно. Освен тоа тука е и современиот начин на живот, долгото седење пред комјутер, тешките училишни ранци. Без разлика за каков деформитет и да се работи, проблемот со кој ќе се соочуваат понатаму во животот овие деца е навистина многу сериозен изјави доктор Велика Лабачевска од Заводот за рехабилитација во Козле.
Во едно друго истражување кое било направено од болницата Ремедика се покажало дека 55 проценти од родителите не ги однеле своите деца на ортопед бидејќи не се информирани за оваа загрижувачка појава. Истражувањето кое било спроведено во седум основни училишта во скопската населба Аеродром, ги потврдило истите податоци добиени од општина Ценатар.
-Постои мала информираност за сколиозата, како настанува, како да се спречи, кои се последиците. Станува збор за сериозно заболување кое се појавува потајно, многу често децата и покрај започнатиот процес на искривување на ‘рбетниот столб сепак имаат исправен став а другите симптоми сè уште не се забележливи до тој степен изјави д-р Иванка Стефановска, шеф на одделението за ортопедија во оваа болница.