Два дена пред објавувањето на Извештајот за напредок на земјите од Западен Балкан во ЕК може да се слушнат првичните неофицијални наоди на еврократијата за сосотојбите на Балканот и за неговата европска перспектива.
Оваа година Албанија е ѕвездата. ЕК се очекува да предложи оваа балканска држава да добие статус на земја кадидат кој би требало да биде одобрен од Европскиот Совет во декември годинава. Албанија оваа позиција ја заслужи со оглед на исполнетиот критериум за одржување на фер и демократски избори. Награда добиваат и проевропските потези на новата влада на социјалистот Еди Рама.
За Србија ЕК ќе повтори дека препорачува старт на преговори за членство доколку Србите ги исполнат очекувањата од преговарачката рамка со Косово. Според многумина познавачи Србија, демонстрирала јасна политичка воља и реално е да се очекува на пролет да ги започне преговорите.
Косово се охрабрува да ги продолжи преговорите во рамките на процесот за стабилизација и асоцијација, додека Црна Гора влегува во поквалитетна фаза на преговорите за членство иако од неа се очекува да направи поконкретни чекори во борбата против корупцијата.
Македонија, како што е познато повторно добива препорака но, очигледно е разочарувањето во ЕК од стагнацијата, а во некои области и од назадувањето на реформските процеси.
Конечно, на дното на листата е Босна и Херцеговина, која се уште не успева да ги реши внатрешните односи помеѓу етнитетите што е кочница и за реформските процеси.
Во секој случај ЕК со овој извештај дава јасен сигнал за политичката воља во ЕУ да се продлабочи процесот на проширувањето и во ЕУ да се интегрира и последната група држави од Балканот.