Новинарот на весникот Tages Anzeiger од Швајцарија, Енвер Робели на Твитер објави дека извори од албанската Влада потврдиле дека Никола Груевски ја поминал границата на Албанија и Црна Гора во неделата со возило од Амбасадата на Унгарија од Тирана.
Неколку албански медиуми ја пренесоа веста дека поранешниот македонски премиер Груевски, во неделата нелегално влегол на територијата на Албанија и ја напуштил земјата упатувајќи се кон Црна Гора. Според нив, тој ја напуштил Албанија на 11 ноември во неделата во 19 часот и 11 минути и со возило од Амбасадата на Унгарија во Тирана, кое според медиумите кои се повикуваат на тамошната полиција, имало регистерски таблички CD1013A влегол на територијата на Црна Гора.
Но Топ Чанел во веста наведува дека системот ТИМС не го регистрирал влезот на Груевски, а констатираат дека тој влегол илегално, преку тнр. зелени премини. Но понатаму повикувајќи се на истите извори, овој медиум објави дека „Груевски бил во автомобил на Унгарската амбасада и со својот пасош ја преминал границата со Црна Гора на преминот Хани-Хоти“. Весникот воопшто не ги споемнува фактот дека на Груевски му се одземени пасошите како мерка на претпазливост.